Ўзбекистонда фирибгарлик сўнгги 4 йилда 4 бараварга (2018 йилда 6483 та, 2019 йилда, 6321 та, 2020 йилда 10 минг 496 та, 2021 йилда 24 минг 554 та) кўпайган. Бу ҳақда адлия вазири Русланбек Давлетов 28 апрель куни Сенатнинг йигирма бешинчи ялпи мажлисида айтиб ўтди, деб хабар бермоқда «Дарё» мухбири.
Русланбек Давлетовнинг айтишича, бугунги кунда аҳоли ҳаётида қандай ҳуқуқий муносабатларда муаммолар бўлаётганлигини таҳлил қилиб бориш, шунга қарата аниқ ва манзилли ишлаш лозим.
«Масалан, фирибгарлик, киберфирибгарлик ҳозир авж оляпти. Янги молиявий пирамидалар пайдо бўляпти. Фуқароларимиз қимор ва бошқа таваккалчиликка асосланган ўйинлар учун жиноий жавобгарлик борлигини билиб туриб ҳам бу йўлдан қайтмаяпти. Ўзбекистонда фирибгарлик сўнгги 4 йилда 4 бараварга, (2018 йилда 6483 та, 2019 йилда, 6321 та, 2020 йилда 10 минг 496 та, 2021 йилда 24 минг 554 та), киберфирибгарлик эса сўнгги 3 йилда 8,3 бараварга кўпайиб, ҳозирда умумий жиноятчиликнинг қарийб 5 фоизига етган», — дейди у.
Адлия вазирини таъкидлашича, аҳолида фирибгарлик, киберфирибгарликка қарши «иммунитет» пайдо қилиш керак.
«Алданиб қолмаслик учун керакли маълумотни етказишимиз, осон даромад топиш илинжида тузоққа тушиб қолмаслик чораларини кўришимиз керак. Иккинчи томондан, давлат органлари ҳушёр бўлиб, фирибгарлик ҳолатларининг олдини олиб бориши зарур. Яқиндаги битта хусусий клиника атрофидаги ҳолатларда, давлат бу клиникага лицензия берган, қонуний ишлашига ишонч билдирилган, мана энди бутун халқни алдагани маълум бўляпти. Жиноятчилар жавобгарликка тортилиб зарарни тўлиқ қопламасдан бир оз муддат озодликдан маҳрум қилиниб, яна озодликка чиқиши кузатилиши мумкинки, бу ҳам аҳолида салбий кайфиятни пайдо қилиши мумкин», — дейди у.
Адлия вазири, шунингдек, жамиятда «самосуд» ҳолатлари ҳуқуқий онгга тескари ишлайдиган ҳолат эканлигини айтди.
«Охирги пайтларда бу ҳолатлар ҳам ошиб бормоқда. ‘Самосуд’ балки ўша заҳоти кимнингдир қонга тўлган кўзларини ёки кузатиб турганларнинг инстинктини ва эҳтиёжини қондирар, лекин узоқ истиқболда эркин жамият қуришга катта тўсиқ бўлади, одамларнинг адолатли ва хавфсиз шароитда яшашга ишончини сўндиради. Шунинг учун бу борадаги тарғибот ва ташвиқотни кучайтириб, ‘самосуд’ ҳолатларига қарши курашишимиз лозим», — дея қўшимча қилади Русланбек Давлетов.
Мавзуга доир:
- Олий Мажлис Сенати ялпи мажлисининг жонли эфири 8 дақиқадан кам давом этди
- Истеъмолчиларга асоссиз ҳисобланган тўловларнинг ярми миқдорида ичимлик суви таъминоти ташкилотидан компенсация талаб қилиш ҳуқуқи берилмоқда
- «Киритилаётган ўзгартиришлар замирида биринчи навбатда аҳоли манфаатлари ётибди». Кўп квартирали уйларни бошқариш соддалашлаштирилмоқда
Изоҳ (0)