Toshkent viloyatida 2 gektar sug‘oriladigan yerni 500 ming dollarga rasmiylashtirib berishni va’da qilgan jamiyat rahbari ushlandi

Davlat xavfsizlik xizmati Toshkent, Navoiy va Samarqand viloyatlarida yer maydonlarining noqonuniy sotilishiga chek qo‘ydi, deb xabar beradi O‘zA.

Xususan, DXXning Toshkent viloyati bo‘yicha boshqarmasi hamda Iqtisodiy jinoyatlarga qarshi kurashish departamentining hududiy boshqarmasi xodimlari hamkorligida tezkor tadbir o‘tkazilgan. Tadbirda Nurafshon shahridagi chorvachilikka ixtisoslashgan mas’uliyati cheklangan jamiyat ta’sischisi mazkur MCHJning 2 gektar sug‘oriladigan yer maydonini 500 ming AQSH dollari evaziga xaridor nomiga rasmiylashtirib berishni va’da qilgani aniqlangan. U oldindan kelishilgan pulning 140 ming dollarini olgan vaqtida ushlangan.

Toshkent viloyatida kuzatilgan yana bir holatda Qibray tumanidagi mas’uliyati cheklangan jamiyat boshqaruvchisi mazkur MCHJga 46 yil muddatga ijara asosida foydalanish uchun berilgan 91 gektar yer maydonining 60 gektarini xaridor nomiga rasmiylashtirib berish evaziga 60 ming dollari talab qilib, oldindan 30 ming dollar olgan vaqtida ushlangan.

Karmana tumanida yashovchi tadbirkor esa o‘ziga davlat-xususiy sherikchilik shartlari asosida sun’iy qoplamali futbol maydonchasi va yordamchi bino obyektini qurishi uchun berilgan 9,9 sotix yer maydonini xaridorga 50 ming dollarga sotishga kelishib, oldindan 30 ming dollar olgan vaqtida DXX Navoiy viloyati bo‘yicha boshqarmasi, viloyat prokuraturasi hamda ichki ishlar boshqarmasi xodimlari tomonidan qo‘lga olingan.

DXX Samarqand viloyati bo‘yicha boshqarmasi va departamentning hududiy boshqarmasi xodimlari hamkorligida o‘tkazilgan tezkor tadbirda Samarqand shahrida yashovchi 42 yoshli shaxs o‘ziga issiqxona tashkil etishi uchun Samarqand tumani hududidan ajratib berilgan 90 sotix yer maydonini 40 ming dollarga sotishga kelishib, oldindan 20 ming dollar olgan vaqtida ushlangan.

Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan.

Avvalroq DXX Toshkent tumanida hokim yordamchisini qo‘lga olgani, Ohangaron hokimligi xodimi 20 ming dollar pora bilan ushlangani, Qo‘qon shahar hokimining 10 ming dollar pora olgan birinchi o‘rinbosari 5 yarim yilga qamalgani to‘g‘risida xabar berilgandi.