O‘zbekistonda o‘simlik yog‘i, go‘sht va kartoshka mahsulotlari importi hamda realizatsiyasi uchun qo‘shimcha qiymat solig‘idan (QQS) berilgan imtiyozlar muddati uzaytirilishi mumkin. Bu haqda Oliy Majlis Qonunchilik palatasi deputati Doniyor G‘aniyev ma’lum qildi.
Soliq kodeksiga o‘zgartirishlar kiritishni nazarda tutuvchi qonun loyihasiga ko‘ra, O‘zbekiston hududiga o‘simlik yog‘i, kungaboqar va zig‘ir urug‘i, shuningdek, soya danagini olib kirish hamda o‘simlik yog‘ini ishlab chiqarish va (yoki) realizatsiya qilish bo‘yicha aylanmalarni QQSdan ozod qilishga oid amaldagi imtiyozlar muddati 2022-yil 31-dekabrgacha uzaytiriladi.
Bundan tashqari, qonun loyihasi bilan 2022-yil 31-dekabrga qadar go‘sht (mol, qo‘y), tirik hayvonlar (mol, qo‘y) va ularni so‘yishdan olingan mahsulotlar, shuningdek, kartoshkani O‘zbekiston hududiga olib kirish hamda ularni realizatsiya qilish bo‘yicha aylanmalarni QQSdan ozod qilish taklif etilmoqda.
Jahon banki ekspertlari fikricha, Ukrainadagi vaziyat tufayli butun dunyoda oziq-ovqat mahsulotlarining narxlari oxirgi 50 yilda kuzatilmagan rekord darajada oshishi kutilmoqda. Ayniqsa, o‘simlik yog‘iga bo‘lgan global talabning 60 foizi Ukraina va Rossiya eksporti hisobiga qondirilishi hisobga olinsa, dunyo bozorlarida o‘simlik yog‘i narxlari yil davomida kamida 30 foizga o‘sishi prognoz qilinmoqda.
“Tabiiyki, bunday holatda o‘simlik yog‘i, shuningdek, go‘sht va kartoshka mahsulotlari importiga nisbatan QQS imtiyozlari berilishi aholimizni asosiy turdagi oziq-ovqat mahsulotlariga bo‘lgan talabini to‘laqonli qondirish hamda ushbu mahsulotlar narxlarini bozorlarda barqaror saqlashga xizmat qiladi”, — deb yozadi deputat.
Shuningdek, deputatga ko‘ra, banan, ananas va boshqa sitruslar uchun bojdan ozod qilish bo‘yicha 2022-yilning 1-mayiga qadar berilgan imtiyozlar muddati ham yil oxirigacha uzaytirilishi mumkin. “Tan olish joizki, bu harakatlar barchasi aholi farovonligini ta’minlash, ularning xarid qobiliyatini oshirishga xizmat qiladi. Shu bilan birga, inflyatsiya darajasini 10-12 foiz atrofida ushlab turish imkonini beradi”, — deydi G‘aniyev.
Eslatib o‘tamiz, 2021-yilda parlament tomonidan 2021-yil 1-maydan 31-dekabrgacha bo‘lgan muddatda kungaboqar va soya urug‘lari hamda o‘simlik yog‘i importi, shuningdek o‘simlik yog‘ini ishlab chiqarish va ichki bozorda realizatsiya qilish QQSdan ozod etilgandi. Keyinroq mazkur imtiyoz yana to‘rt oyga uzaytirilgandi. Dekabr oyida esa O‘zbekistonda asosiy oziq-ovqat mahsulotlari importi va realizatsiyasi uchun qo‘shimcha qiymat solig‘idan (QQS) berilgan imtiyozlar muddati uzaytirilgan.
Izoh (0)