Эрон ва Хитой мудофаа соҳасида ҳамкорликни кучайтириш зарурлиги тўғрисида келишиб олди, деди Эрон Қуролли кучлари бош штаби бошлиғи Муҳаммад Ҳусайн Багерий Хитой мудофаа вазири Вей Фенхенинг Теҳронга ташрифи доирасида.
«Хитой мудофаа вазири билан бўлиб ўтган учрашувда биз қўшма ҳарбий машғулотлар ўтказиш, оператив тажриба алмашиш, кадрлар тайёрлаш ва икки давлат ҳарбийлари ўртасидаги бошқа қўшма тадбирларда икки томонлама ҳамкорликни кенгайтиришга келишиб олдик. Шу йўл билан ҳар икки давлат учун ҳам хавфсизликни таъминлаш имкони бўлади», — деган Багерий Хитой мудофаа вазири билан музокарадан сўнг.
Ўз навбатида, Эрон президенти Иброҳим Раисий Вей Фенхе билан учрашувда Эрон—Хитой муносабатларини стратегик деб атаган. Шу билан бирга, у Теҳрон ва Пекин ўртасида 25 йиллик ҳамкорлик тўғрисидаги келишувни тилга олган.
2021 йилнинг март ойида Эрон ва Хитой ташқи ишлар вазирлари Жавад Зариф ҳамда Ван И икки давлат ўртасида 25 йил муддатга кенг қамровли стратегик шериклик тўғрисидаги битимни имзолаган эди. Битим 20 та йўналишда, хусусан, сиёсат, ижро ҳокимияти органлари ўртасидаги ҳамкорлик, маданий, ҳуқуқий, мудофаа, хавфсизлик соҳаларида ўзаро ҳамкорлик, шунингдек, минтақавий ва халқаро масалалар бўйича алоқаларни ривожлантиришни назарда тутади.
Изоҳ (0)