АҚШ 2021 йилнинг август ойида Афғонистондан қўшинларини олиб чиққач, мамлакатда қиймати 7 миллиард доллардан ортиқ бўлган ҳарбий техникаларни қолдириб кетган. Бу ҳақда АҚШ Мудофаа вазирлиги ҳисоботига таяниб, CNN хабар берди.
Ҳисоботда айтилишича, 2005 йилдан 2021 йилгача Қўшма Штатлар Афғонистон ҳукуматига 18,6 миллиард долларлик ҳарбий техника ҳадя қилган.
2021 йилнинг августида АҚШ қўшинлари олиб чиқиб кетилганидан кейин мамлакатда 7,12 миллиард долларлик техника қолган. Улар Афғонистонда ҳокимият тепасига келган «Толибон» ҳаракати қўлига ўтди, дея хабар беради CNN.
Телеканал маълумотларига кўра, Афғонистонда Америка самолётлари, ҳарбий машиналари, қурол-яроғлари, ўқ-дорилари, алоқа воситалари ва бошқа жиҳозлари қолган. Аксарият қуролларнинг ишлаши учун эса уларга доимий техник хизмат кўрсатиш талаб қилинади.
Ҳисоботда айтилишича, АҚШ ҳарбий раҳбарияти ташлаб кетилган мулкни олиб кетиш ёки йўқ қилиш учун Афғонистонга қайтмоқчи эмас.
2021 йил 14 апрелда АҚШнинг амалдаги президенти Жо Байден Афғонистондаги ҳарбий амалиётини тўхтатиш қарорини эълон қилди, бу Америка тарихидаги энг узоқ хорижий ҳарбий кампанияга айланган эди. Америка қўшинларини олиб чиқиш 2021 йилнинг май ойида бошланган ва 31 августда якунланган.
2021 йил август ойи ўрталарида, Мозори Шариф ва Кобул «Толибон» назоратига ўтган пайтда бу шаҳарлардан афғон ҳарбийлари ўнлаб самолёт ва вертолётларни Ўзбекистон ва Тожикистонга олиб қочган. АҚШ мудофаа вазирлиги вакиллари ушбу техникалар Афғонистонга қайтарилмаслигини айтган.
Ўзбекистон ҳукумати ҳам, Тожикистон ҳукумати ҳам Афғонистоннинг ўғирланган ҳарбий самолётлари бўйича расмий изоҳ бермаган.
Изоҳ (0)