DXX Samarqandda xorijdan o‘qishni ko‘chirish uchun qalbaki hujjat tayyorlovchi shaxslarni qo‘lga oldi

Samarqandda fuqaroni Ukrainadagi OTMda o‘qishi to‘g‘risida hujjat tayyorlab, uni O‘zbekistondagi oliy ta’lim muassasalaridan biriga ko‘chirish evaziga pul talab qilgan shaxslar ushlandi, deb xabar beradi O‘zA.

Ma’lum qilinishicha, Davlat xavfsizlik xizmati Samarqand viloyati boshqarmasi hamda viloyat IIB xodimlari hamkorligida tezkor tadbir o‘tkazilgan. Tezkor tadbir davomida Samarqand shahridagi o‘quv markazlaridan birining rahbari 22 yoshli R.H. va “Agrobank” xodimi X.F. mahalliy fuqaroga Ukraina oliygohining 1-kursida o‘qigani to‘g‘risida hujjat tayyorlab, keyinchalik o‘qishini Samarqand iqtisodiyot va servis institutiga ko‘chirib berishni va’da qilgani aniqlangan.

Ular o‘z “xizmati evaziga” 5 ming dollar so‘ragan va pulning 2,5 ming dollarini olayotgan vaqtida huquq-tartibot organlari xodimlari tomonidan ushlangan.

Hozirda ushbu shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.

Avvalroq Buxoroda fuqaroning Tojikistondagi o‘qishini ko‘chirib berish uchun 2 ming dollar olgan ayol qo‘lga tushgani, Surxondaryoda fuqaroning Tojikistondagi o‘qishini 1,5 ming dollar evaziga ko‘chirib berishni va’da qilgan shaxs ushlangani to‘g‘risida xabar berilgandi.