O‘zbekistonda xotin-qizlarga nisbatan qayd etilgan zo‘ravonlik holatlarining 34 330 tasi yoki 87 foizi oilada sodir etilgan. Bu haqda bugun AOKAda IIV Huquqbuzarliklar profilaktikasi xizmati boshlig‘i o‘rinbosari polkovnik Umida Abdullayeva, Oila va xotin-qizlar davlat qo‘mitasi boshqarma boshlig‘i Bahodirjon Qahhorov, Bosh prokuratura bo‘lim boshlig‘i O‘ktam O‘tayev ishtirokida o‘tkazilgan matbuot anjumanida ma’lum qilindi.
Ma’lum qilinishicha, 2021-yil davomida tegishli mutasaddi idoralari bilan hamkorlikda o‘tkazilgan tadbirlar davomida 667 mingga yaqin xonadonlarga uyma-uy kirib, oiladagi ijtimoiy-ma’naviy muxit o‘rganilgan. Profilaktik hisobda turgan 505 nafar qizlar ta’lim muassalariga jalb etilgan, 328 nafar og‘ir ijtimoiy ahvolda qolgan, shu jumladan, oilaviy muammolar va turmushida zo‘rlik ishlatilishiga duch kelgan xotin-qizlar “Zo‘rlik ishlatishdan jabr ko‘rgan shaxslarni reabilitatsiya qilish va moslashtirish markazlari”ga joylashtirilgan.
Hamkorlikda amalga oshirilgan tadbirlar natijasida, 17 296 nafar, shu jumladan, 624 nafar voyaga yetmagan qizlar, 3 605 nafar yosh (18-30 yosh), 520 nafar ilgari sudlangan xotin-qizlar ichki ishlar organlari hisobidan chiqarilgan.
2021-yil davomida ichki ishlar organlariga xotin-qizlarga nisbatan tazyiq va zo‘ravonlik holatlar yuzasidan 39 343 ta murojaatlar kelib tushgan. Xotin-qizlarni tazyiq va zo‘ravonlikdan himoya qilish maqsadida, 39 343 nafar xotin-qizlarga himoya orderlari rasmiylashtirib berildi. Himoya orderlarining 378 tasi voyaga yetmagan, 9 861 tasi yoshlar (18-30 yosh), 29 104 tasi 30 yoshdan katta xotin-qizlarga berilgan.
Murojaatlarni o‘rganishda 106 ta jinsiy, 234 ta iqtisodiy, 18 777 ta ruhiy, 13 658 ta jismoniy zo‘ravonlik hamda 7 174 ta tazyiq holatlar aniqlangan.
Tahlillarga ko‘ra, xotin-qizlarga nisbatan qayd etilgan zo‘ravonlik holatlarining 34 330 tasi yoki 87 foizi oilada sodir etilgan. Himoya orderlarning 26 667 tasi turmush o‘rtoqlari, 1 559 tasi qaynonalar, 1 128 tasi kelinlar hamda 9 989 tasi boshqa shaxslarga nisbatan rasmiylashtirilgan. Qo‘llanilgan himoya orderlari natijada 20 769 ta holatda oila yarashtirilgan, 15 142 tasida nizo bartaraf etilgan, 921 tasida oila ajrashgan, 2 222 ta holatda nizo bartaraf etilmagan.
Eslatib o‘tamiz, 2020-yilda xotin-qizlarni tazyiq va zo‘ravonlikdan hismoya qilish bo‘yicha prezident qarori qabul qilingan. Hujjatga asosan, tazyiq va zo‘ravonlikdan jabrlangan ayollarga himoya orderi berish tartibi tasdiqlangan. Shunigdek, xotin-qizlarga gap otganlarni javobgarlikka tortish taklif qilingan edi
Izoh (0)