АКТ вазири Шерзод Шерматов дастурчилар учун қайси вилоят манфаатлироқ бўлишини маълум қилди

Жиззах вилояти жон бошига дастурлаш хизматлари ҳажми бўйича ҳудудлараро рейтингда 11 поғона кўтарилиб, 3-ўринга чиқди. Бу ҳақда Ахборот технологиялари ва коммуникацияларини ривожлантириш вазири Шерзод Шерматов маълум қилди.

2 йил аввал жон бошига дастурлаш хизматлари ҳажми бўйича энг охирги ўринда Жиззах вилояти эди. Давлатимиз раҳбари томонидан вилоятларда ҳам дастурчиларни ўзига жалб этишга ҳаракат қилиш бўйича белгиланган вазифаларни тўғри тушунган вилоят ҳокими сабабли Жиззах вилояти 2 йилда 11 поғона кўтарилиб, ушбу кўрсаткич бўйича ҳудудлар орасида 3-ўринни эгаллади — деб ёзади Шерзод Шерматов.

Вазирга кўра, Жиззах вилояти ҳокими АКТ ривожланишини устувор йўналиш сифатида ўз шахсий назоратига олиб, вилоят ҳокимлиги ёнида замонавий IT Park биносини қурган.

Ҳиндистон билан ҳамкорликдаги IT-университет, BPO мактаби ва масофавий экспорт хизматлари марказини, умуман олганда, ўзига хос IT-кластерни ташкил этган ва маҳаллий дастурчилар лойиҳалари учун маблағлар ажратган.

Рейтингда биринчи ўрин охирги 4 йилдан бери ўзгаришсиз Тошкент шаҳри, иккинчи ўрин эса 5 поғонага кўтарилган Бухоро вилояти ҳисобланади.

Ўз ҳудудида юқори маошли ишчи ўринларини яратиш, хизматлар экспортини ошириш ва шу орқали маҳаллий бюджетга даромадларни кўпайтириш ниятида бўлган ҳудудлар раҳбарлари АКТ соҳасини ҳам устувор соҳа сифатида белгилаб, АКТ учун жозибадор ҳудудга айланишга ҳаракат қилишса, масофавий экспорт марказларини яратиш бўйича юборилган таклифларни назоратга олса, мақсадга мувофиқ бўлади.

Дастурчиларнинг ва BPO хизматлари кўрсатаётганларнинг ҳудудга ишончини ошириб уларни расмий рўйхатдан ўтиб, ишлашларига шароит яратиб, кадрлар тайёрлашга ва қўшимча ҳудудий лойиҳаларга маблағ ажратишса, албатта, ўша ҳудуддаги маҳаллий дастурчилар Тошкентга кетишга ҳаракат қилишмайди, аксинча Тошкентда фаолият юритаётган АКТ компаниялари ҳам ўша ҳудудга боришга ҳаракат қилишади.

Шу сабабли вилоятларда яшаш харажатлари ҳамда ойлик маошлар Тошкентдагига нисбатан пастлиги уларнинг таннархини туширишга ёрдам беради.

АКТ мутахассисларига талаб юқори бўлгани сабабли улар ўзига қулай бўлган жойда ишлашга ҳаракат қилишади. Шу сабабли одатда вилоятда ўсиб ўрганган яхши АКТ мутахассиси Тошкентга келиб ишларди, кейинчалик эса кўпчилиги катта лойиҳаларда ишлаш учун чет элга кетишга ҳаракат қиларди. Кўз тегмасин, охирги йиллардаги АКТ соҳасига давлатимиз раҳбарининг эътибори сабабли чет элга кетган мутахассислар ҳам қайтиб келиб, ўша хизматларини масофадан Ўзбекистонда яшаб кўрсатиш ҳолатлари кўпаймоқда — деб ёзади вазир.

Бундан ташқари  EPAM, Exadel, iTechArt, iTransition каби қатор йирик корхоналарнинг Ўзбекистондаги бўлинмалари кенгайиши ҳам маҳаллий дастурчиларга чет элга кетмасдан туриб, шу ерда катта лойиҳаларда юқори маошли ишда ишлашга имкониятлар очиши таъкидланади.

Аввалроқ Шерзод Шерматов Ўзбекистон нима учун чет эл IТ компанияларини таклиф қилишини тушунтиргани ҳақида хабар берилган эди.