Европа иттифоқининг камида 10 та мамлакати Россияга нисбатан қўлланилган эмбаргони айланиб ўтган ҳолда қиймати 350 миллион еврога тенг қурол-яроғ, ҳарбий техник воситалар экспорт қилган. Бу ҳақда Евроиттифоқ маълумотларига таяниб The Telegraph хабар қилди.
Ушбу умумий экспорт ҳажмининг, тахминан, 78 фоизи немис ва француз компаниялари ҳисобига тўғри келади. Улар Россияга 273 миллион евро қийматидаги ҳарбий техника етказиб берган ва ушбу қурол-яроғдан катта эҳтимол билан Украинада фойдаланилмоқда. Австрия, Болгария, Буюк Британия, Италия ва Чехия ҳам Россияга қурол сотган.
Германия ҳамда Франция бомбалар, ракеталар, снарядлар ва бошқа қуролларни Россияга 2014 йилда Қримни қўшиб олинганидан кейин қўлланилган тақиқни айланиб ўтган ҳолда юбориб турган.
Немис компаниялари ЕИ эмбаргосидаги заиф нуқтадан фойдаланиб, Москвага 121 миллион евролик ускуналар, ўқотар қуроллар ва зирҳланган техника сотган, дейилади Евроиттифоқ маълумотларида. Шунингдек, Франциянинг 76 та экспорт лицензияси доирасида 152 миллион евролик ҳарбий юкларни Россияга юборгани аниқланган. Париж экспортёрларнинг 2014 йилгача тузилган шартномаларни амалга оширишига рухсат берган ва бу орқали ЕИнинг эмбаргосини четлаб ўтган. Франция фирмалари бомбалар, ракеталар ва торпедолар билан бир қаторда мингдан зиёд Россия танклари учун иссиқликни ушлаб турадиган махсус камералар, шу билан бирга қирувчи самолётлар ва ҳаводан зарба йўллайдиган вертолётлар учун навигацион тизимлар берган.
Италия Германия ва Франция каби Москвага 22,5 евролик, Буюк Британия эса 2,4 миллион евролик қурол-яроғ етказиб берган. Австрия, Болгария ва Чехия 2015 йилдан 2022 йилгача Россияга жами 49,3 миллион евролик қурол экспорт қилган.
Еврокомиссия маълумотлари бўйича ЕИ давлатлари 2021 йилда Россияга 39 миллион евро қийматидаги қурол ва ўқ-дорилар сотган.
Россия Украинада махсус ҳарбий операцияларни бошлаганидан кейин ЕИ Москвага иккиламчи товарлар экспортига қўшимча чекловлар жорий қилди. Эмбаргони айланиб ўтиш имконини берадиган яширин йўл 8 апрелда тўлиқ ёпилди.
ЕИ ҳисоботи Россия марказий ҳарбий округи қўшинлари қўмондонининг ўринбосари Рустам Миннекаев Москва Украина жануби ҳамда Донбассни тўлиқ назорати остига олишни мақсад қилганини айтганидан кейин пайдо бўлган.
Изоҳ (0)