Vena Rossiyaga qarshi gaz embargosining joriy etilishini qo‘llab-quvvatlamayapti, chunki Avstriya sanoati sezilarli darajada Rossiya yonilg‘isiga bog‘liq, mamlakatning “boshqa tanlovi yo‘q”. Bu haqda Avstriya moliya vaziri Magnus Brunner CNN’ga ma’lum qildi.
“Sanksiyalar mo‘ljallangan yo‘nalishdan ortiq narsaga ziyon yetkazyaptimi, o‘ylaymanki, bundan foyda kam”, — deydi Brunner.
14-aprel kuni Avstriya kansleri Karl Nexammer Venaning pozitsiyasiga Berlin va Budapesht ham qo‘shilishini ma’lum qilgandi. “Avstriya gaz embargosiga yolg‘iz qarshi chiqmayapti”, — degan u. Keyinroq Nexammer Avstriya 80 foiz Rossiya gaziga bog‘liqligini, u ham uy xo‘jaliklari, ham ishlab chiqarishda kerakligini ta’kidlagan. “Balki bir necha yildan keyin Rossiya gazidan mustaqil bo‘larmiz, lekin bugun yoki ertaga emas”, — deya qayd etgandi kansler.
22-aprel kuni Germaniya kansleri Olaf Shols ham gaz embargosiga qarshi shu kabi dalillarni keltirgan. Uning aytishicha, hukumat Germaniyada “dramatik iqtisodiy inqiroz yuz berishi, millionlab ish o‘rinlari yo‘qolishiga” yo‘l qo‘ymaslikka harakat qilmoqda.
Vengriya hukumati rahbari Viktor Orban mart boshlarida Rossiya energiya tashuvchilariga qarshi sanksiyalar joriy etilishi Budapesht uchun og‘ir damlarni yuzaga keltirishidan ogohlantirgan edi. O‘shanda u Vengriyadagi oilalarning 90 foizi o‘z uyini katta qismi Rossiyadan xarid qiluvchi gaz yordamida isitishini aytgandi.
2021-yilda Yevropa Ittifoqi davlatlari Rossiyadan 155 milliard kub metr gaz sotib olgan — bu Yevropa gaz importining 40 foizini tashkil etadi.
Avvalroq Germaniya vitse-kansleri Robert Xabek Rossiya gaziga qo‘yilgan embargo oqibatlaridan ogohlantirgani to‘g‘risida xabar berilgandi.
Izoh (0)