Jizzax viloyatining Forish tumanidagi sel ko‘pchilikka moddiy zarar yetkazish barobarida, bir necha kishilarni jon jigaridan ham ayirdi. Kimningdir qizi, kimningdir singlisi, yana kimningdir nabirasi selga g‘arq bo‘ldi.
Sel sabab bor budidan ajralgan forishlik ayol Dilfuza Sayaqulova “Daryo” muxbiri bilan suhbatda o‘sha kungi voqea haqida gapirib, “Allohga shukurki, sal bo‘lmasa men ham 12 yoshli o‘g‘lim Shohjahondan ajralib qolardim”, — deydi.
“O‘sha kuni sel boshlangan paytda o‘g‘lim, men va qaynotam uyimizning uchta, alohida-alohida xonalarida qolib ketdik. Vahimali ovoz eshitilgach, oradan hech qancha vaqt o‘tmay, sel kela boshladi. Uydan chiqay desam, suvning balandligi bir metrdan oshgan. Shuningdek, eshik yopilib qolgan va sira ochilmaydi. Uy esa suvga to‘lmoqda. Shunda o‘g‘limning ‘ota’ deb baqirgan ovozini eshitdim. Undan keyin hech narsani eshitmadim, faqat sel shovqini eshitilardi. Shunchalik dahshat ediki, hozir hatto tasavvur ham qilolmayman. Sel suvi shu darajada sovuqki, oppoq muzdan iborat edi. Uy borgan sari suvga to‘lib borardi. Shunda uyning podvali eshigini ochdim va suvni podvalga yo‘naltirdim. O‘zim esa uy derazasini buzib, oshxona tomonga o‘tdim. So‘ngra oshxona shiferini sindirib, tashqariga chiqishga urindim”, — deydi Dilfuza Sayaqulova.
Dilfuza opaning aytishicha, birozdan so‘ng suv kamaygach, uning yoniga qaynotasi kelgan.
“Qaynotamni ko‘rgach, ularga bergan birinchi savolim, ‘bolam tirikmi, qani u?’ degan gap bo‘ldi. Qaynotam o‘g‘limni ushlab qolganini, so‘ngra daraxt tepasiga chiqazib qo‘yganini aytdi. Shundan so‘ng tinchlanib, qaynotamga bolam uchun kiyim berdim”, — deydi seldan jabr ko‘rgan ayol.
Ayolning aytishicha, seldan omon qolgan o‘g‘li o‘sha paytda ko‘p jarohat olgan.
“O‘g‘limning oyoqlari, butun badani ko‘karib ketgan ekan. Keyin hamma joyi qon bo‘lib ketgandi. Shilingan, tirnalgan joylari ko‘p edi. Ammo shukurki, u omon qoldi. Hozir qarindoshlarimiz g‘amxo‘rligi sabab ahvoli ancha yaxshilandi”, — deydi u.
Selda oqib, yuz metrga yetgach, bobosi tomonidan qutqarilgan Shohjahonning ammasi — Malohat Mahmudovaning aytishicha, jiyani suvdan olib chiqilgach, unga birinchi yordamni u ko‘rsatgan.
“Jiyanimni ko‘rib, judayam qo‘rqib qoldim. To‘g‘risi, o‘sha paytdagi holatni tushuntirib ham berolmayman, ahvoli juda og‘ir edi”, — deydi Malohat opa.“Daryo” muxbiri bilan suhbatlashgan Dilfuza Sayaqulovaning aytishicha, seldan so‘ng qutqaruvchilar har bir xonadonga kirib, oila a’zolaridan kim bor-yo‘qligi bilan qiziqqan.
“Selda oqib ketib, vafot etgan qo‘shni 11-sinf qiz haqida men ham eshitdim. Ularning uyi selning aynan yo‘lida joylashgani uchunmi, ularda sel bizdan-da kuchli bo‘lgan. Qizning akasi onasi va singlisini qutqarish uchun ularni ushlagan. Onasini ko‘tarib olib, singlisiga o‘zini qattiq ushlab olishi kerakligini tayinlagan. Ammo, afsuski, qizning qo‘li akasini qattiq ushlolmay, chiqib ketgan va selda oqib ketgan”, — deydi voqea haqida eslagan ayol.
Avvalroq hududga 2022-yilning 20-aprel kuni tushdan so‘ng kelgan sel 1 soat-u 30 daqiqa oqib turgani, oqibatda “Egizbuloq”da joylashgan 263 ta xo‘jalikning 53 tasi to‘liq yaroqsiz holga kelgani, 44 tasiga esa o‘rtacha va 163 tasiga yengil darajada talafot yetgani xabar berilgandi.
Mavzuga doir: Sirdaryodan Forishga insonparvarlik ko‘magi jo‘natildi
Izoh (0)