Andijonda ilk bor o‘tkazilgan buyrak ko‘chirish operatsiyasida uka akasiga donorlik qildi

Andijon shahar tibbiyot birlashmasi markaziy shifoxonasi Xirurgiya bo‘limida murakkab transplantatsiya jarrohlik amaliyoti — 29 yoshli ukaning bir buyragi 37 yoshli bemor akasiga ko‘chirib o‘tkazildi. Bu haqda “Daryo”ga viloyat sog‘liqni saqlash boshqarmasi axborot xizmati rahbari Mufazzalshoh Muhammadiyev xabar berdi.

“Buyrak yetishmovchiligining rivojlanganlik darajasi besh bosqichga bo‘linadi. Ushbu bemorda xastalik beshinchi daraja — terminal bosqichgacha yetgan. Bunday holatlarda bemorning hayotini saqlab qolishning yagona usuli-buyrak transplantatsiyasini amalga oshirish hisoblanadi. Ya’ni donordan sog‘lom buyrak olinib, bemorning o‘z vazifasini bajarmayotgan buyragi o‘rniga qo‘yiladi. Natijada bemorning umr ko‘rish davomiyligi 1,5-2 baravarga oshadi.

Bugungi jarrohlik amaliyotida Respublika ixtisoslashtirilgan Xirurgiya ilmiy-amaliy tibbiyot markazi qon-tomir jarrohligi va buyrak transplantatsiyasi bo‘limi rahbari, tibbiyot fanlari doktori Fazliddin Baxritdinov boshchiligidagi brigada viloyatimizning malakali shifokorlari hamrohligida ikki bosqichli operatsiyani o‘tkazishmoqda”, — deydi Andijon shahar tibbiyot birlashmasi xirurgiya bo‘limi mudiri Husniddin Usmonov.

Ma’lum qilinishicha, olti soatga yaqin davom etgan jarrohlik amaliyoti muvaffaqiyatli o‘tgan bo‘lib, hozirda bemorlarning ahvoli yaxshi.

“Fevral oyida somsa yeganda o‘ti dimlanib, mazasi bo‘lmagandi. Shifokorlar ko‘rigidan o‘tkazganimizda buyrak yetishmovchiligi mavjudligi aniqlangan. Avvaliga ishonmasdan Toshkentda ham ko‘riklardan o‘tkazildi. Unda ham shu tashxis qo‘yildi.

Vrachlarning aytishicha, kasallik boshlanganiga 7 yilcha bo‘libdi. Lekin shu kungacha o‘g‘limda biror marotaba kasallik alomatlari kuzatilmagan. Chuqur tekshirishlardan o‘tkazilgach, poytaxtlik shifokorlar buyrak transplantatsiyasi amaliyotini tavsiya qilishdi. Shunda keyin ukasi Imomali bir buyragini berishga qaror qildi. Mana hozir operatsiya jarayonida. Ilohim ikkisi ham farzandlari baxtiga sog‘ bo‘lishsin”, — deydi bemor va donorning onasi Tursunoy Hasanova.