Жиззах вилоятининг Фориш туманидаги сел кўпчиликка моддий зарар етказиш баробарида, бир неча кишиларни жон жигаридан ҳам айирди. Кимнингдир қизи, кимнингдир синглиси, яна кимнингдир набираси селга ғарқ бўлди.
Сел сабаб бор будидан ажралган форишлик аёл Дилфуза Саяқулова «Дарё» мухбири билан суҳбатда ўша кунги воқеа ҳақида гапириб, «Аллоҳга шукурки, сал бўлмаса мен ҳам 12 ёшли ўғлим Шоҳжаҳондан ажралиб қолардим», — дейди.
«Ўша куни сел бошланган пайтда ўғлим, мен ва қайнотам уйимизнинг учта, алоҳида-алоҳида хоналарида қолиб кетдик. Ваҳимали овоз эшитилгач, орадан ҳеч қанча вақт ўтмай, сел кела бошлади. Уйдан чиқай десам, сувнинг баландлиги бир метрдан ошган. Шунингдек, эшик ёпилиб қолган ва сира очилмайди. Уй эса сувга тўлмоқда. Шунда ўғлимнинг ‘ота’ деб бақирган овозини эшитдим. Ундан кейин ҳеч нарсани эшитмадим, фақат сел шовқини эшитиларди. Шунчалик даҳшат эдики, ҳозир ҳатто тасаввур ҳам қилолмайман. Сел суви шу даражада совуқки, оппоқ муздан иборат эди. Уй борган сари сувга тўлиб борарди. Шунда уйнинг подвали эшигини очдим ва сувни подвалга йўналтирдим. Ўзим эса уй деразасини бузиб, ошхона томонга ўтдим. Сўнгра ошхона шиферини синдириб, ташқарига чиқишга уриндим», — дейди Дилфуза Саяқулова.
Дилфуза опанинг айтишича, бироздан сўнг сув камайгач, унинг ёнига қайнотаси келган.
«Қайнотамни кўргач, уларга берган биринчи саволим, ‘болам тирикми, қани у?’ деган гап бўлди. Қайнотам ўғлимни ушлаб қолганини, сўнгра дарахт тепасига чиқазиб қўйганини айтди. Шундан сўнг тинчланиб, қайнотамга болам учун кийим бердим», — дейди селдан жабр кўрган аёл.
Аёлнинг айтишича, селдан омон қолган ўғли ўша пайтда кўп жароҳат олган.
«Ўғлимнинг оёқлари, бутун бадани кўкариб кетган экан. Кейин ҳамма жойи қон бўлиб кетганди. Шилинган, тирналган жойлари кўп эди. Аммо шукурки, у омон қолди. Ҳозир қариндошларимиз ғамхўрлиги сабаб аҳволи анча яхшиланди», — дейди у.
Селда оқиб, юз метрга етгач, бобоси томонидан қутқарилган Шоҳжаҳоннинг аммаси — Малоҳат Маҳмудованинг айтишича, жияни сувдан олиб чиқилгач, унга биринчи ёрдамни у кўрсатган.
«Жиянимни кўриб, жудаям қўрқиб қолдим. Тўғриси, ўша пайтдаги ҳолатни тушунтириб ҳам беролмайман, аҳволи жуда оғир эди», — дейди Малоҳат опа.«Дарё» мухбири билан суҳбатлашган Дилфуза Саяқулованинг айтишича, селдан сўнг қутқарувчилар ҳар бир хонадонга кириб, оила аъзоларидан ким бор-йўқлиги билан қизиққан.
«Селда оқиб кетиб, вафот этган қўшни 11-синф қиз ҳақида мен ҳам эшитдим. Уларнинг уйи селнинг айнан йўлида жойлашгани учунми, уларда сел биздан-да кучли бўлган. Қизнинг акаси онаси ва синглисини қутқариш учун уларни ушлаган. Онасини кўтариб олиб, синглисига ўзини қаттиқ ушлаб олиши кераклигини тайинлаган. Аммо, афсуски, қизнинг қўли акасини қаттиқ ушлолмай, чиқиб кетган ва селда оқиб кетган», — дейди воқеа ҳақида эслаган аёл.
Аввалроқ ҳудудга 2022 йилнинг 20 апрель куни тушдан сўнг келган сел 1 соат-у 30 дақиқа оқиб тургани, оқибатда «Эгизбулоқ»да жойлашган 263 та хўжаликнинг 53 таси тўлиқ яроқсиз ҳолга келгани, 44 тасига эса ўртача ва 163 тасига енгил даражада талафот етгани хабар берилганди.
Мавзуга доир: Сирдарёдан Форишга инсонпарварлик кўмаги жўнатилди
Изоҳ (0)