Avstriya Rossiya Ukrainada harbiy operatsiya boshlanganidan keyin ushbu mamlakatdan neft solib olishni to‘xtatdi. Bu haqda OMV Group vakillariga tayanib, Kurier gazetasi xabar berdi.
“Rossiyadan neft xarid qilish hajmi doim kam bo‘lgan, urush boshlangach, biz uni bozordagi boshqa neftga almashtirdik”, — deydi Avstriya kompaniyasi vakillari.
Mamlakat Statistika boshqarmasi va Neft sanoati assotsiatsiyasi ma’lumotlariga ko‘ra, Avstriyaning 2021-yildagi importini 7,8 foizi yoki 596 ming tonnasigina Rossiya hisobiga to‘g‘ri kelgan.
Ta’kidlanishicha, Qozog‘iston “uzoq yillardan beri” Avstriyaga asosiy neft yetkazib beruvchi hisoblanadi — butun importning 38,9 foizi unga to‘g‘ri keladi. Ikkinchi o‘rinda Liviya (22,1 foiz) bo‘lsa, uchinchi o‘rinda Iroq (20,7 foiz) joylashgan.
Avvalroq Litva Yevropa Ittifoqi mamlakatlari orasida birinchi bo‘lib Rossiya gazidan to‘liq voz kechgandi. Bir necha kun oldin esa Avstriya kansleri Karl Nexammer Rossiya gazidan voz kechishi uchun yillar kerakligini ma’lum qilgan edi. Uning so‘zlariga ko‘ra, hozirda Rossiya Avstriyani 80 foiz gaz bilan ta’minlaydi.
Izoh (0)