Xitoy rahbari Si Szinpin bir tomonlama sanksiyalarga qarshi chiqdi

Xitoy rahbari Si Szinpin har yili o‘tkaziladigan Boao forumidagi nutqi chog‘ida “butun sayyoramizdagi tinchlik va xavfsizlikka put ur yetkazuvchi” bir tomonlama sanksiyalar va ikki tomonlama standartlar siyosatini tanqid qildi, deb xabar bermoqda Reuters.

“Biz bir tomonlama sanksiyalarga qarshimiz hamda bloklar tuzish va qarama-qarshilikni kuchaytirishga qaratilgan siyosat olib borish niyatida emasmiz. Xitoy inqirozni hal qilish bo‘yicha har qanday sa’y-harakatlarni qo‘llab-quvvatlaydi, biz ikki tomonlama standartlarga amal qilmaymiz”, — dedi u.

Xitoy rahbarining so‘zlariga ko‘ra, Pekin ma’lum bir mamlakatlarning “uzun qo‘l yurisdiksiyasi”ni (milliy qonunchilikni mamlakat tashqarisiga yoyish – tahr.) qat’iyan qabul qilmaydi. “Faktlar yana bir bor isbotladiki, ‘Sovuq urush’ mentaliteti faqat global tinchlik asoslarini buzadi, gegemonizm va qo‘pol kuch siyosati dunyo tinchligiga xavf tug‘diradi, bloklar qarama-qarshiligi esa XXI asrda xavfsizlik muammolarini yanada kuchaytiradi”, — deya xulosa qildi Si Szinpin.

Xitoy rahbarining nutqi Rossiyaning Ukrainaga bosqini boshlangandan so‘ng ko‘plab G‘arb davlatlarining Moskvaga qarshi sanksiyalar kiritishi fonida yangradi. G‘arb cheklovlari Rossiya prezidentidan tortib, moliya va sanoat tashkilotlariga, davlat korporatsiyalariga, shuningdek, Markaziy bankning aktivlariga taalluqlidir.

Xitoy G‘arbning Rossiyaga qarshi sanksiyalarini bir necha bor qoralagan. 18-mart kuni Si Szinpin AQSH prezidenti Jo Bayden bilan suhbatda allaqachon Ukrainadagi inqiroz “Xitoy ko‘rishni istaydigan narsa emas”ligini, Qo‘shma Shtatlar Xitoy bilan birgalikda tinchlik va sayyoradagi barqarorlikni saqlash uchun javobgar bo‘lishi kerakligini aytgandi.

Shu bilan birga, Xitoy TIV Yevropa departamenti direktori Van Lutongning aytishicha, Pekin Moskvaga qarshi sanksiyalarni qasddan chetlab o‘tmaydi, biroq ayni paytda u bilan normal savdo aloqalarini saqlab turibdi. “Xitoy Ukrainadagi mojaroning tarafi emas. Bu biror davlat bilan savdo-sotig‘imizga ta’sir qilishi kerak, deb o‘ylamaymiz”, — dedi u.