Bandlik va mehnat munosabatlari vazirligi mas’ullari aralashuvi bilan Rossiyada mehnat qilayotgan buxorolik o‘zbek muhojiri farzandi bolalar bog‘chasiga boradigan bo‘ldi. Bu haqda vazirlik axborot xizmati xabar berdi.
Vazirlik axborot xizmati rahbari Mavjuda Mirzayevaning ma’lumot berishicha, vazirlik tomonidan tuzilgan ishchi guruh 2022-yilning 6—13-aprel kuni Rossiyada bo‘lib, xorijda mehnat qilayotgan o‘zbek muhojirlari hayotini o‘rgangan.
“Biz har bir vatandoshimiz bilan suhbatlashib, ularning mehnat sharoitlari va imkoniyatlarini o‘rgandik. Ularni qiynab kelayotgan muammolarga ko‘mak berib, o‘zbekistonliklar xorijda ham e’tiborimizda ekanini ko‘rsatdik”, — deydi vazirlik axborot xizmati rahbari Mavjuda Mirzayeva.
Mavjuda Mirzayevaning ma’lumot berishicha, Rossiyaning Leningrad viloyatida mehnat qilayotgan buxorolik Jonibek Ibrohimov yosh farzandi Umirbekni ota-onasi qaramog‘ida qoldirib, o‘zi va turmush o‘rtog‘i Rossiyaga ishlashga ketgan.
“Biz Rossiyada bo‘lib, yurtdoshlarimizning ishlash sharoiti bilan tanishib yurganimizda Buxoro viloyatining Qorako‘l tumanidan bo‘lgan Jonibek Ibrohimov ayni kunda o‘zi va xotini Rossiyada ishlayotganini, farzandi Umirbek bolalar bog‘chasiga chiqolmayotganini aytib, ko‘mak so‘ragandi. Biz Rossiyadan qaytganimizdan so‘ng, ataylab Buxoroga bordik va Jonibek Ibrohimovning muammosini hal qildik”, — deydi vazirlik vakili.
Qorako‘l tuman Maktabgacha ta’lim bo‘limi mas’uli Mahmud Qulliyevning aytishicha, Jonibek Ibrohimovning farzandi hujjatlari tayyorlangan bo‘lib, Umirbek uch ish kunida bolalar bog‘chasiga qatnay boshlaydi.
Izoh (0)