O‘zbekiston transport infratuzilmasi orqali giyohvand moddalarni olib o‘tishga urinishlar ko‘paygan. Bu haqda SHHTga a’zo davlatlarning giyohvandlikka qarshi kurashish bo‘yicha vakolatli organlari rahbarlarining 12-majlisida O‘zbekiston Vazirlar Mahkamasi huzuridagi Giyohvand moddalarni nazorat qilish milliy axborot-tahlil markazi direktori Olim Narzullayev ma’lum qildi, deb xabar beradi “Dunyo” agentligi.
“Afg‘onistondan shimoliy yo‘nalish orqali giyohvand moddalar savdosining hajmi oshmoqda. Ayniqsa, mintaqa mamlakatlari bilan faol integratsiya jarayonlari fonida ularning hududlari orqali asosiy giyohvand moddalarning oqimi ortmoqda. Xususan, O‘zbekiston transport infratuzilmasi orqali giyohvand moddalarni olib o‘tishga urinishlar ko‘paygani kuzatilyapti”, — deydi Olim Narzullayev.
O‘tgan bir yil ichida musodara qilingan giyohvand moddalar hajmi 1 ming 864,4 kilogrammga teng bo‘lgan. Bu ko‘rsatgich 2020-yilga nisbatan 20,9 foizga ko‘p.
Eslatib o‘tamiz, 2021-yil avgust oxirlarida “Tolibon” harakati Afg‘onistonda hokimiyat tepasiga kelgach, mamlakatning giyohvand moddalari yetishtirishni to‘xtatishi haqida va’da bergandi. “Endi giyohvand moddalar ishlab chiqarilmaydi va kontrabanda yo‘li bilan boshqa davlatlarga olib o‘tilmaydi. Afg‘oniston afyun yetishtiradigan mamlakat bo‘lmaydi”, — degan harakat vakili Zabihulla Mujohid. U shunday siyosat olib borish uchun “Tolibon”ga xorij davlatlarining ko‘magi zarurligini ham ta’kidlagan.
2022-yil aprel boshlarida “Tolibon” hukumati Afg‘onistonda opium yetishtirish va giyohvand moddalar ishlab chiqarishni taqiqladi. O‘zbekiston prezidentining Afg‘oniston bo‘yicha maxsus vakili Ismatulla Irgashev “Tolibon”ning mazkur qarori turli terroristik guruhlarni opiy sotishdan tushgan daromad manbasidan mahrum qilishini aytgan.
Izoh (0)