Кобулдаги иккита мактаб яқинида содир этилган портлашлар оқибатида 6 киши ҳалок бўлди

Кобулнинг ғарбий туманларидан биридаги таълим муассасалари яқинида камида учта портлаш содир бўлди, деб хабар бермоқда Reuters.

Маҳаллий матбуотнинг хабар беришича, биринчи портлаш «Мумтоз» ўқув маркази яқинида, сўнгра яна иккита портлаш Абдул Раҳим Шаҳид ўгил болалар ўрта мактаби яқинида содир бўлган.

Афғонистон хавфсизлик ва соғлиқни сақлаш расмийларига кўра, портлашлар оқибатида камида олти киши ҳалок бўлган, 11 киши яраланган. Расмийлар қурбонлар сони ортишидан хавотирда.

Reuters агентлигининг таъкидлашича, гап ҳазоралар жамоаси вакиллари — келиб чиқиши аралаш шиа мусулмонлари яшайдиган Даште-Барчи тумани ҳақида кетмоқда. Портлаш ўқувчилар мактабдан чиқаётган пайтда содир бўлган.

Ҳозирча минтақада фаолият юритаётган ҳеч бир гуруҳ ҳодиса учун жавобгарликни ўз зиммасига олмади.

Аввал Кобулдаги шифохонада портлаш содир этилгани, Афғонистон ғарбидаги Ҳирот шаҳрида микроавтобус портлагани ҳақида хабарлар берилган.