Moskvada “Gazprombank” sobiq vitse-prezidenti Vladislav Avayev, uning rafiqasi va voyaga yetmagan qizi o‘lik holda topildi. Bu haqda Rossiya huquq-tartibot organlariga tayanib, “TASS” xabar bergan.
Xabarda qayd etilishicha uchala jasad ham o‘qotar quroldan yaralanib, vafot etgan.
“Taxminlarga ko‘ra, Avayev rafiqasi va qizini otib tashlagan, so‘ngra o‘z joniga qasd qilgan bo‘lishi mumkin”, — deya ma’lum qilgan “TASS” manbasi.
Tergov qo‘mitasining Moskva shahar boshqarmasi matbuot xizmati halok bo‘lganlarning ism-shariflarini oshkor etmagan holda jinoyatning shunday alomatlarga ega ekanini xabar qilgan.
“TASS” manbasining fikricha, hodisaga maishiy, o‘zaro oilaviy nizo sabab bo‘lgan.
Vladislav Avayev OAVda “Karboniks” kompaniyasining ta’sischilaridan biri sifatida tez-tez qayd etilardi. Kompaniya suyak o‘rnini bosadigan uglerod implantlarini ishlab chiqaradi. Jurnalistlar “Karboniks”ning yana bir ta’sischisi Anastasiya Karneyeva “Rostex” rahbari o‘rinbosari, iste’fodagi Federal xavfsizlik xizmati generali Nikolay Volobuyevning qizi deb hisoblaydi. “Karboniks” va “Rostex” Avayev bir vaqtlar boshqargan “RT-Karbon”ning ta’sischilari hisoblanadi.
“Moskovskiy komsomolets” nashri Vladislav Avayevning bir vaqtlar Rossiya prezidentining ishlar boshqarmasi va Davlat dumasida faoliyat olib borgani haqida yozgan. Keyinchalik Avayev davlat xizmatidan biznesga o‘tgan. “Gazprombank”da ishlagan, Rossiya iqtisodiy organlarining maslahatlashuv kengashiga kirgan. Tibbiyot sohasiga bog‘liq tijorat ishini yuritgan, “RT-Karbon”ni boshqargan, “Karboniks”ning nazorat paketiga egalik qilgan. Avayevning rafiqasi Yelena esa “Yevrosement” kompaniyasida ishlagan.
Izoh (0)