Владимир Путин Россия қуруқликдаги қўшинларининг 64-алоҳида мотоўқчи бригадасига гвардия мақомини берди. Бу ҳақдаги фармон Кремль расмий сайтида эълон қилинган.
Ҳужжат матнида ушбу ҳарбий мақом «бригада шахсий таркибининг қуролли низолар вақтида ватанни ва давлат манфаатларини ҳимоя қилишда жанговар операциялардаги қаҳрамонона ҳаракатлари, мардлиги, шижоати ва жасорати» сабаб берилгани қайд этилган.
Украина Мудофаа вазирлиги 64-мотоўқчи бригада Киев вилоятидаги Буча шаҳрида кузатилган мудҳиш жиноятлар ва тинч аҳолининг қийноққа солинганига алоқадор деб ҳисобламоқда.
Буча шаҳри Украинада уруш бошланган дастлабки кунларданоқ Россия қўшинлари ихтиёрига ўтган. Март охирида россиялик ҳарбийлар шаҳардан чиқиб кетди, шундан кейин Бучада ўнлаб украиналикларнинг жасадлари кўчаларда қолдирилгани ойдинлашди. Ҳалок бўлганларнинг фотосуратлари ва видеолари, шунингдек шаҳарда юз берган воқеалар ҳақидаги маҳаллий аҳоли вакилларининг ҳикоялари жаҳон ОАВ ҳамда халқаро ҳуқуқ ҳимоячилари ташкилотлари томонидан эълон қилинди.
Украина ушбу қотилликларда россиялик аскарларни айблади. Россия ҳукумати вакиллари Бучада юз берган воқеаларни «провокация» ва «саҳналаштирилган» кўринишлар деб таъриф берган. Мустақил манбалар Буча кўчаларидаги мурдалар Россия қўшинлари шаҳар ҳудудини назорат қилган даврда ҳам бўлганини қайд этган.
Мавзуга доир:
- Макрон Россия ҳукумати Бучадаги жиноят учун жавоб бериши кераклигини айтди. Шольц эса янги санкцияларни эълон қилди
- Бучадаги оммавий қирғин Европадаги ваҳшийликлар рўйхатига киритилади — Евроиттифоқ
- Фото: Европа шаҳарларида Бучада ўлдирилган тинч аҳоли хотирасига бағишлаб акциялар ўтказилди. Иштирокчилар қўллари орқага боғланган ҳолда ерга ётиб олган
Изоҳ (0)