Shavkat Mirziyoyev raisligida 19-aprel kuni o‘tkazilgan videoselektor yig‘ilishida mahallabay ishlash tizimida amalga oshirilgan ishlar bo‘yicha ma’lumot berildi. Bu haqda prezident matbuot kotibi xabar qildi.
Qayd etilishicha, mahallalardagi hokim yordamchilarining tashabbusi bilan 50 mingta oilaviy tadbirkorlik loyihalarini amalga oshirish uchun 1 trillion 300 milliard so‘m kredit va 20 milliard so‘m subsidiya ajratilgan. Natijada hududlarda 47 mingta yangi tadbirkorlar faoliyati yo‘lga qo‘yilgan, 8 mingta kichik sanoat va servis loyihalari ishga tushirilgan, 2,5 mingta korxona quvvatlari tiklangan va oshirilgan.
“O‘zbekiston tarixida birinchi marta bunday katta raqamlar amalda bo‘lganini gapiryapmiz. Mahallada tizim va sharoit yaratganimiz, albatta, qaysi tuman va shahar rahbarlari fidoyi bo‘lib ishlagan bo‘lsa, natija beryapti”, — degan prezident.
Eng yaxshi natija ko‘rsatgan 14 nafar hokim yordamchilarini mukofotlash, ijobiy natijaga erishgan 2 ming 943 nafar hokim yordamchilariga tashakkurnoma yuborish topshirilgan. Ijobiy natija ko‘rsatgan hokim yordamchilari va respublika vakillari “Yangi O‘zbekiston islohotchisi” ko‘krak nishoniga munosib nomzodlar zaxirasi ekani ko‘rsatib o‘tilgan.
Izoh (0)