Шавкат Мирзиёев раислигида 19 апрель куни ўтказилган видеоселектор йиғилишида маҳаллабай ишлаш тизимида амалга оширилган ишлар бўйича маълумот берилди. Бу ҳақда президент матбуот котиби хабар қилди.
Қайд этилишича, маҳаллалардаги ҳоким ёрдамчиларининг ташаббуси билан 50 мингта оилавий тадбиркорлик лойиҳаларини амалга ошириш учун 1 триллион 300 миллиард сўм кредит ва 20 миллиард сўм субсидия ажратилган. Натижада ҳудудларда 47 мингта янги тадбиркорлар фаолияти йўлга қўйилган, 8 мингта кичик саноат ва сервис лойиҳалари ишга туширилган, 2,5 мингта корхона қувватлари тикланган ва оширилган.
«Ўзбекистон тарихида биринчи марта бундай катта рақамлар амалда бўлганини гапиряпмиз. Маҳаллада тизим ва шароит яратганимиз, албатта, қайси туман ва шаҳар раҳбарлари фидойи бўлиб ишлаган бўлса, натижа беряпти», — деган президент.
Энг яхши натижа кўрсатган 14 нафар ҳоким ёрдамчиларини мукофотлаш, ижобий натижага эришган 2 минг 943 нафар ҳоким ёрдамчиларига ташаккурнома юбориш топширилган. Ижобий натижа кўрсатган ҳоким ёрдамчилари ва республика вакиллари «Янги Ўзбекистон ислоҳотчиси» кўкрак нишонига муносиб номзодлар захираси экани кўрсатиб ўтилган.
Изоҳ (0)