O‘zbekiston aholisining qariyb yarmida qo‘shimcha daromadga ehtiyoj bor

Shavkat Mirziyoyev raisligida 19-aprel kuni mahallabay ishlash tizimi natijadorligini oshirish hamda aholi bandligini ta’minlash masalalari yuzasidan videoselektor yig‘ilishi boshlandi. Bu haqda prezident matbuot kotibi xabar qildi.

Yig‘ilishda bosh vazir o‘rinbosarlari, viloyat, tuman va shahar hokimlari 2 ta eng muhim masala bo‘yicha hisobot beradi:

• hokim yordamchilari 3 oylik faoliyatining dastlabki natijalari;
• aholi bandligini ta’minlash bo‘yicha birinchi chorakda amalga oshirilgan ishlar”, – dedi davlat rahbari so‘zining avvalida.

Qayd etilishicha, hokim yordamchilari uch oy davomida 35,3 million aholi yashaydigan 6 million 900 ming xonadonni to‘liq xatlovdan o‘tkazib, ularni 4 ta toifaga ajratgan. Bular:

• 11 foizi – kam daromadli;
• 47 foizi – doimiy daromadi bo‘lgani bilan qo‘shimcha daromadga ehtiyoji bor;
• 6 foizi – ijtimoiy himoyaga muhtoj;
• 36 foizi – iqtisodiy ahvoli yaxshi, o‘ziga to‘q oilalar hisoblanadi.

Yangi tizim orqali har bir hokim, uning iqtisod bo‘yicha 1-o‘rinbosari va hokim yordamchilari aholining 64 foizi bilan manzilli ishlashi kerakligini bilib olgan. Bu borada joylardagi mutasaddi rahbarlar va hokim yordamchilari birinchi va ikkinchi toifadagi xonadonlar bilan ishlab, 3 oyda 736 ming nafar fuqaroning bandligini ta’minlagan. Shuningdek, 54 ming nafar fuqarolarni kasb-hunar va tadbirkorlikka o‘qitgan.