13-aprel kuni kechqurun Ukraina OAVlari va siyosatchilar “Moskva” kreyseri Ukrainada ishlab chiqarilgan ikkita “Neptun” qanotli raketalari bilan urilgani haqida xabar bergandi. 14-aprel kuni Rossiya Mudofaa vazirligi “Moskva” raketa kreyseri bortida yong‘in chiqqani va u yerda o‘q-dorilar portlaganini tasdiqladi. O‘sha kuni kechqurun kreyser Qora dengizda bo‘ron tufayli cho‘kib ketgani ma’lum bo‘ldi. Kreyser 2022-yil fevral oyida Rossiyaning Ukrainadagi operatsiyasi paytida Zmyeney orolini nazorat qilishda ishtirok etgan. Operatsiya davomida 80 dan ortiq ukrainalik chegarachi taslim bo‘lgani aytiladi.
Rossiya flotida endi faqat ikkita shunga o‘xshash kema — Shimoliy flotdagi Marshal Ustinov va Tinch okeanidagi Varyag kemalari qoldi. Qrimning Sevastopol shahri gubernatori Mixail Razvojayev “Moskva” kreyseri shahar uchun “haqiqiy timsol” ekanini aytdi. Rossiya dengiz flotining flagmani bo‘lgan ushbu kreyserning tarixi haqida “RBK” fotoreportaj tayyorladi.
Kreyser Ukraina SSRning Nikolayev shahridagi kemasozlik zavodida qurilgan va dastlab “Slava” deb nomlangan.
1989-yil noyabr oyida kema ekipaji SSSR rahbari Mixail Gorbachyov va AQSH prezidenti katta Jorj Bush o‘rtasidagi uchrashuvni ta’minladi. Ammo bo‘ronli ob-havo tufayli barcha tadbirlar Marsashlokk ko‘rfazida langar tashlagan og‘irroq kemaga — “Maksim Gorkiy” kruiz layneriga ko‘chirildi. Malta sammitida hech qanday kelishuv imzolanmagan, biroq Berlin devori qulaganidan bir hafta o‘tib o‘tkazilgan ushbu yig‘ilish Sovuq urushning tugashi haqidagi deklaratsiya sifatida ko‘riladi.
1991-yilda kema kapital ta’mirlash va modernizatsiya qilish uchun Nikolayevga olib kelindi, kemani yangilash uchun pul yo‘q edi, shu sabab kreyserni ishdan chiqarish masalasi ko‘tarildi. Qora dengiz floti qo‘mondonligi Moskva hukumatiga “Slava” kreyseriga homiylik qilish so‘rovi bilan murojaat qildi. 1996-yil 16-mayda kema nomi “Slava”dan “Moskva”ga o‘zgartirildi va u Qora dengiz flotining flagmaniga aylandi.
2008-yil 9—12-avgust kunlari kreyser Gruziyadagi harbiy operatsiyada qatnashdi. Rossiya, Gruziya va Janubiy Osetiya qurolli kuchlari ishtirokidagi harbiy harakatlar — besh kunlik urush natijasi Rossiya tomonidan Janubiy Osetiya va Abxaziya mustaqilligining tan olinishi bo‘ldi.
2015-yil 30-sentabrda Federatsiya Kengashi Rossiya qo‘shinlarining Suriyada hukumat kuchlari tarafida bo‘lgan terrorchi guruhlarga qarshi tashlanishini ma’qulladi. Kreyser O‘rta yer dengizining sharqiy qismida joylashgan Rossiya harbiy-dengiz kuchlarining doimiy ishchi guruhiga rahbarlik qilgan. Kema Rossiyaning Suriyadagi aviaguruhini havo hujumidan himoyalagan. Raketa kreyseri rossiyalik uchuvchilarga qarshi provokatsiyalarning oldini olish maqsadida Latakiya provinsiyasi qirg‘oqlari yaqinidagi pozitsiyani egallagan.
Izoh (0)