Rossiya Markaziy banki 18-apreldan boshlab banklarning aholiga naqd pul sotish imkoniyatini qayta tikladi. Bu regulyator 8-aprel kuni e’lon qilgan naqd valyuta bilan bog‘liq operatsiyalar tartibini vaqtincha yumshatish choralarida qayd etilgan.
Shu bilan birga, Markaziy bankning aniqlik kiritishicha, banklar kassaga 9-apreldan boshlab kirim qilingan valyutalarni sota oladi.
Bundan tashqari, 11-apreldan boshlab regulyator ayrim toifadagi fuqarolarga o‘z hisobidan nafaqat dollar, balki yevroni ham naqd ko‘rinishda yechib olishga ruxsat bergan. Bunda umumiy limit 10 ming dollardan oshmasligi kerak.
Eslatib o‘tamiz, Rossiya 24-fevralda Ukrainada maxsus harbiy operatsiya boshlagan. 2-mart kuni Vladimir Putin Rossiya hududidan 10 ming dollardan ortiq valyuta olib chiqib ketishni taqiqlash to‘g‘risidagi farmonni imzolagandi. Mazkur farmon “AQSh hamda unga qo‘shilgan xorijiy davlatlar hamda xalqaro tashkilotlarning Rossiyaga qarshi sanksiyalar qo‘llash bilan bog‘liq do‘stona bo‘lmagan va xalqaro huquqqa zid harakatlari munosabati bilan” imzolangan.
9-mart kuni esa Rossiya Markaziy banki rossiyaliklarning xorijiy valyutadagi hisob raqamlaridan naqd pul berishni vaqtincha chekladi. Shundan buyon Rossiya banklari mijozlarga o‘z hisob raqamlari yoki omonatlaridan 10 ming dollargacha naqd pul yechish, qolgan mablag‘lar pul olingan kundagi bozor kursi bo‘yicha rublda berilayotgandi.
Aprel oyida urush boshlanganidan keyin keskin tushib ketgan rubl kursi sezilarli darajada mustahlanib oldi. 8-aprel kuni Markaziy bank valyuta nazoratiga qo‘yilgan choralarni biroz yengillashtirdi, asosiy yillik stavkani 20 foizdan 17 foizga tushirdi, brokerlar orqali valyuta xarid qilingandagi komissiyani bekor qildi.
Izoh (0)