Aprel boshlarida Saudiya Arabistoni bosimi ostida o‘z vakolatlarini Prezident kengashiga topshirgan Yaman prezidenti Mansur Hodiy hozirda “uy qamog‘ida saqlanmoqda”. Bu haqda The Wall Street Journal o‘z manbalariga tayanib, xabar berdi.
Suhbatdoshlardan birining so‘zlariga ko‘ra, Hodiy hozirda Ar-Riyoddagi qarorgohda bo‘lib, telefon aloqasidan foydalana olmaydi.
WSJ manbalarining ma’lum qilishicha, Saudiya Arabistoni valiahd shahzodasi Muhammad bin Salmon Hodiyga o‘z vakolatlarini kengashga topshirish to‘g‘risidagi dekretni topshirgan. Ma’lumotlarga ko‘ra, shahzoda Yamandagi boshqa yetakchilar amaldagi prezidentning o‘z vakolatlarini topshirish vaqti yetganiga rozi bo‘lganini aytgandi. Shuningdek, Ar-Riyod Hodiy tomonidan amalga oshirilgan korrupsion jinoyatlarni e’lon qilish orqali tahdid qilgan.
Gazetaning Saudiya Arabistonidagi manbasi prezidentga uni fosh etish bilan bosim bo‘lganini rad etgan.
Prezident ofisi rahbari Abdulla al-Alimiy Hodiyning uy qamog‘iga olingani to‘g‘risidagi ma’lumotni rad etgan, biroq o‘zining prezident bilan bog‘lanishi uchun vaqt kerakligini ta’kidlagan.
Yamandagi mojarolar 2014-yildan beri davom etmoqda. Harbiy ziddiyatlar 2015-yilning mart oyida Saudiya Arabistoni boshchiligidagi koalitsiya kuchlarining respublika prezidenti Mansur Hodiy tarafiga kelib qo‘shilganidan so‘ng kuchaydi. Ularga Eron tomonidan qo‘llab-quvvatlanayotgan “Ansar Alloh” harakati tarkibiga kiruvchi yamanlik isyonchilar qarshilik ko‘rsatmoqda.
7-aprel kuni Hodiy Prezident kengashi tashkil etilib, o‘z vakolatlarini unga topshirishini e’lon qildi. Kengashdan al-Alimiy boshchiligida sakkiz kishi o‘rin olgan. U xalqqa birinchi murojaatida “keng qamrovli tinchlik jarayoni” orqali Yamanda tinchlik o‘rnatishga va’da bergan.
Izoh (0)