Россия Марказий банки аҳолига банклардан нақд валюта харид қилишга яна рухсат берди

Россия Марказий банки 18 апрелдан бошлаб банкларнинг аҳолига нақд пул сотиш имкониятини қайта тиклади. Бу регулятор 8 апрель куни эълон қилган нақд валюта билан боғлиқ операциялар тартибини вақтинча юмшатиш чораларида қайд этилган.

Шу билан бирга, Марказий банкнинг аниқлик киритишича, банклар кассага 9 апрелдан бошлаб кирим қилинган валюталарни сота олади.

Бундан ташқари, 11 апрелдан бошлаб регулятор айрим тоифадаги фуқароларга ўз ҳисобидан нафақат доллар, балки еврони ҳам нақд кўринишда ечиб олишга рухсат берган. Бунда умумий лимит 10 минг доллардан ошмаслиги керак.

Эслатиб ўтамиз, Россия 24 февралда Украинада махсус ҳарбий операция бошлаган. 2 март куни Владимир Путин Россия ҳудудидан 10 минг доллардан ортиқ валюта олиб чиқиб кетишни тақиқлаш тўғрисидаги фармонни имзолаганди. Мазкур фармон «АҚШ ҳамда унга қўшилган хорижий давлатлар ҳамда халқаро ташкилотларнинг Россияга қарши санкциялар қўллаш билан боғлиқ дўстона бўлмаган ва халқаро ҳуқуққа зид ҳаракатлари муносабати билан» имзоланган.

9 март куни эса Россия Марказий банки россияликларнинг хорижий валютадаги ҳисоб рақамларидан нақд пул беришни вақтинча чеклади. Шундан буён Россия банклари мижозларга ўз ҳисоб рақамлари ёки омонатларидан 10 минг долларгача нақд пул ечиш, қолган маблағлар пул олинган кундаги бозор курси бўйича рублда берилаётганди.

Апрель ойида уруш бошланганидан кейин кескин тушиб кетган рубль курси сезиларли даражада мустаҳланиб олди. 8 апрель куни Марказий банк валюта назоратига қўйилган чораларни бироз енгиллаштирди, асосий йиллик ставкани 20 фоиздан 17 фоизга туширди, брокерлар орқали валюта харид қилингандаги комиссияни бекор қилди.