Italiya bosh vaziri Mario Dragi Corriere della Sera nashriga bergan intervyusida Rossiya prezidenti Vladimir Putin bilan telefon suhbatlarini “foydasiz” deb hisoblay boshlaganini aytdi.
Dragining so‘zlariga ko‘ra, 30-mart kuni bo‘lib o‘tgan so‘nggi suhbat chog‘ida u Putindan mojaroni hal qilish uchun Ukraina prezidenti Vladimir Zelenskiy bilan qachon uchrashishini so‘ragan, Rossiya prezidenti esa “hali vaqti kelmadi” deb javob bergan.
“O‘t ochishni to‘xtatish bo‘yicha muzokaralar olib boring”, — deb turib oldim, ammo yana shu javobni eshitdim: “Hali vaqti kelmadi”.
Dragining aytishicha, suhbat yakunida ular bir necha kundan keyin qo‘ng‘iroqlashishga kelishib olgan, biroq hech qancha o‘tmay Buchada Rossiya harbiylari tomonidan ko‘plab tinch aholi o‘ldirilgani haqida xabarlar paydo bo‘lgan.
“U bilan gaplashish befoyda deganlar haq, bu faqatgina vaqtni behuda o‘tkazish, deb o‘ylay boshladim. Men har doim Fransiya prezidenti Emmanuel Makronni himoya qilganman va Yevropa Ittifoqi Kengashining amaldagi raisi sifatida u muloqot uchun har qanday imkoniyatni izlashda haqli ekanini aytishda davom etaman. Lekin menga shunday tuyuladiki, so‘z va telefon qo‘ng‘iroqlari bu qirg‘inli urush dahshatlarida, bolalar va ayollarga nisbatan qilingan ishlarda mutlaqo foydasiz”, — deya xulosa qildi Italiya bosh vaziri.
11-aprel kuni Avstriya kansleri Karl Nexammer Rossiyaga tashrif buyurib, Putin bilan muzokaralar o‘tkazgan edi. Uchrashuv davomida kansler Ukrainadagi harbiy jinoyatlar mavzusini ko‘tarib, aybdorlar jazolanishi zarurligini qayd etgan. Muzokaralardan so‘ng Nexammar bu “do‘stona tashrif bo‘lmaganini” aytib, suhbatni “juda ham to‘g‘ridan to‘g‘ri, ochiq va qattiq” deb atagan.
Nexammer Rossiya Ukrainaga hujum boshlagandan beri Putin bilan shaxsan uchrashgan birinchi yevropalik yetakchi bo‘ldi.
Izoh (0)