Yevroparlament Fransiya prezidentligiga nomzod, ultra o‘ngchi “Milliy uyushma” partiyasining yetakchisi Marin Le Pen va uning sheriklaridan 617 ming yevro undirmoqchi, deb yozadi Le Figaro. Partiya a’zolari noqonuniy xarajatlarda, xususan, Le Pen 137 ming yevroni o‘zlashtirishda ayblanmoqda.
Gap Le Pen Yevroparlament a’zosi bo‘lgan paytda amalga oshirilgani aytilayotgan xarajatlar haqida ketmoqda.
Avvalroq Fransiyaning Mediapart nashri Yevropa Ittifoqining Firibgarlikka qarshi kurashish boshqarmasi hisobotiga tayanib, Le Pen va “Milliy uyushma”ning yana uch nafar a’zosi Yevropa parlamenti budjet mablag‘larini o‘g‘irlashda gumon qilinayotgani haqida maqola chop etgandi. Unda aytilishicha, mablag‘lar partiyaning ichki maqsadlari: reklama buyumlari, shuningdek, 2014-yilda partiya qurultoyi uchun vino xarid qilish, yo‘l xarajatlari va mehmonxonada yashash uchun sarflangan. Umuman olganda, Firibgarlikka qarshi kurash boshqarmasi keltirgan xarajatlar 2007-yildan 2014-yilgacha bo‘lgan davrga tegishli, deb yozadi Mediapart.
“Ularning bir necha yillar davomida qayta-qayta qasddan qilgan va noto‘g‘ri xatti-harakatlari, Yevroparlamentdagi burch va mas’uliyat darajasini hisobga olgan holda, ushbu to‘rt sobiq deputatni jiddiy qonunbuzarliklarda gumon qilish uchun yetarli asosdir. Ularning xulq-atvori va qoidalarga rioya qilmasligi jiddiy qoidabuzarliklari uchun javobgarlikka tortilishi kerakligini anglatadi”, — deyiladi hujjatda. Hujjat sudga topshirilgan.
Le Penning matbuot kotibi Mediapart nashriga bergan izohida, bu ayblovlarni rad etdi va tergov 2017-yilgacha bo‘lgan davrni hisobga olganiga, ammo hisobot aynan hozir jamoatchilik maydonida paydo bo‘lganiga e’tibor qaratdi.
Ayni paytda Fransiyada prezidentlik saylovlari bo‘lib o‘tmoqda. Birinchi turda Marin Le Pen 23,15 foiz, amaldagi davlat rahbari Emmanuel Makron 27,84 foiz ovoz olgandi. Siyosatchilar ikkinchi turga o‘tdi, unda ovoz berish 24-aprel kuni bo‘lib o‘tadi.
Izoh (0)