“Roma” so‘nggi 5 yilda uch marta Yevrokuboklar 1/2 finaliga chiqdi. Bu davrda faqat 4 jamoa bunga erisha olgan

“Roma” Konferensiyalar Ligasi chorak finalida “Budyo-Glimt”ni mag‘lub etib, (1:2, 4:0), yarim finalga yo‘l oldi.

Rimliklar so‘nggi 5 yilda uchinchi bor Yevrokuboklar yarim finaliga chiqdi.

“Bo‘rilar” 2017/18-yilgi mavsumdan keyin Chempionlar Ligasi (2018), Yevropa Ligasi (2021) va Konferensiyalar Ligasi (2022) 1/2 final bosqichiga chiqishni uddaladi.

Bu vaqt ichida “Roma”dan boshqa faqat uchta jamoa shunday natijaga erishgan — “Arsenal” (Yevropa Ligasida 3 marta yarim finalga chiqqan), “Liverpul” (Chempionlar Ligasida 3 marta yarim finalga chiqqan) va “Real” (Chempionlar Ligasida 3 marta yarim finalga chiqqan).

Qayd etish joiz, Joze Mourinyo shogirdlari ushbu mavsumda ilk bor “Budyo-Glimt”ni mag‘lub etishga muvaffaq bo‘ldi.

Jamoalar joriy mavsumning o‘zida o‘zaro 4 marta to‘qnash keldi. Guruh bosqichidagi dastlabki o‘yin Norvegiya klubining 6:1 hisobidagi g‘alabasi bilan yakunlandi. Ikkinchi bahsda 2:2 hisobidagi durang qayd etildi. Chorak final birinchi o‘yinda esa “Budyo-Glimt” “Roma”ni 2:1 hisobida mag‘lub etgandi.

Rimliklar Konferensiyalar Ligasi yarim finalida “Lester” bilan to‘qnash keladi.