«Рома» сўнгги 5 йилда уч марта Еврокубоклар 1/2 финалига чиқди. Бу даврда фақат 4 жамоа бунга эриша олган

«Рома» Конференциялар Лигаси чорак финалида «Будё-Глимт»ни мағлуб этиб, (1:2, 4:0), ярим финалга йўл олди.

Римликлар сўнгги 5 йилда учинчи бор Еврокубоклар ярим финалига чиқди.

«Бўрилар» 2017/18 йилги мавсумдан кейин Чемпионлар Лигаси (2018), Европа Лигаси (2021) ва Конференциялар Лигаси (2022) 1/2 финал босқичига чиқишни уддалади.

Бу вақт ичида «Рома»дан бошқа фақат учта жамоа шундай натижага эришган — «Арсенал» (Европа Лигасида 3 марта ярим финалга чиққан), «Ливерпуль» (Чемпионлар Лигасида 3 марта ярим финалга чиққан) ва «Реал» (Чемпионлар Лигасида 3 марта ярим финалга чиққан).

Қайд этиш жоиз, Жозе Моуриньо шогирдлари ушбу мавсумда илк бор «Будё-Глимт»ни мағлуб этишга муваффақ бўлди.

Жамоалар жорий мавсумнинг ўзида ўзаро 4 марта тўқнаш келди. Гуруҳ босқичидаги дастлабки ўйин Норвегия клубининг 6:1 ҳисобидаги ғалабаси билан якунланди. Иккинчи баҳсда 2:2 ҳисобидаги дуранг қайд этилди. Чорак финал биринчи ўйинда эса «Будё-Глимт» «Рома»ни 2:1 ҳисобида мағлуб этганди.

Римликлар Конференциялар Лигаси ярим финалида «Лестер» билан тўқнаш келади.