Сеул Москвага нисбатан босимни кучайтириши ва жаҳон ҳамжамиятининг ҳаракатини қўллаб-қувватлаши керак. Бу ҳақда Жанубий Кореянинг янги президенти Юн Сок Ёл Washington Post газетасига берган интервьюсида маълум қилди.
«Биз Россияга нисбатан амалдаги ҳукумат томонидан маълум даражада олиб борилаётган халқаро босим кампаниясида иштирок этишимиз керак», — дейди Юн Сок Ёл.
Давлат раҳбарининг қўшимча қилишича, халқаро ҳамжамият Сеулдан фаолроқ ҳаракатлар талаб қилса, Жанубий Корея ҳукумати «ўз муносабатини — халқаро тартибга ҳурматини қатъий намойиш этиши керак».
Унинг сўзларига кўра, Жанубий Корея Украинага ҳозирга қадар 10 миллион долларлик ҳарбий ёрдам юборган, бироқ ҳукумат буни етарли деб ҳисобламайди. Шу сабабли президент ҳукуматга Сеул Киевни қандай қўллаб-қувватлай олишини ўрганишни буюрган.
13 апрель куни Yonhap агентлиги Жанубий Корея ҳукумати Украинага умумий қиймати 1,6 миллион долларлик қўшимча ҳимоя нимчалари ва шлемлар, шунингдек, дори воситалари ва озиқ-овқат маҳсулотларини беришга қарор қилгани ҳақида ёзганди.
Аввалроқ Жанубий Корея мудофаа вазири Со Ук Украинага қурол етказиб бериш имкониятини рад этган эди. Бунгача Жанубий Корея Ташқи ишлар вазирлиги раҳбари Чон Ий Ен Сеул Киевга 30 миллион долларлик гуманитар ёрдам етказишни ва унинг умумий миқдорини 40 миллион долларга оширишни режалаштираётганини маълум қилганди. Бир неча кун олдин Украина президенти Владимир Зеленский Жанубий Кореяга ҳарбий ёрдам сўраб мурожаат қилган.
Эслатиб ўтамиз, Жанубий Кореяда президентлик сайловлари 9 март куни бўлиб ўтган ва Юн Сок Ёл 48,59 фоиз овоз билан унда ғалаба қозонган эди. У «Фуқаролик кучи» мухолифат консерватив партияси номзоди ҳисобланади. Инаугурация маросими 10 май куни бўлиб ўтади.
Изоҳ (0)