Buxoroda amakisi uyiga o‘g‘rilikka tushgan jiyanga sud hukmi o‘qildi

Buxoro viloyatining G‘ijduvon tumanida amakisi uyiga o‘g‘rilikka tushgan jiyanga sud hukmi o‘qildi. Bu haqda “Daryo”ga Jinoyat ishlari bo‘yicha G‘ijduvon tumani sudi sudyasi Boborahim Ochilov xabar berdi.

Sh.Sh. Rossiya Federatsiyasida ishlab qaytgan amakisi R.S.ni ko‘rish uchun uning G‘ijduvon tumanidagi xonadoniga mehmon bo‘lib borgan. Biroq darvozasi berkligi sabab hovli oldida ancha vaqt kutgan. Hech kim kelavermagach, ikkinchi amakisi V.S.ga qo‘ng‘iroq qilib, ularning qayerda ekanini so‘ragan va uzoq qishloqqa marakaga ketganini bilib olgan.

Sud hujjatlarida qayd etilishicha, amakisining hovlisida hech kim yo‘qligini bilgan Sh.Sh. orqa devor orqali yashirin ravishda hovliga kirgan. Eshik va derazalari qulflangan xonalarning deraza oynalarini sindirib, deraza oshxona ichkarisiga o‘tgan. Xona burchagidagi sandiq ustidagi ko‘rpa-to‘shaklarni ag‘darib, kapkir bilan sandiqning tepa qismidagi yog‘och qismlarini sindirib ochgan va uning ichidan 6 ming dollar hamda 250 ming so‘m naqd pullarni, ayollar sumkasi ichida bo‘lgan jami bahosi 8 million 400 ming so‘mlik tilla va kumush taqinchoqlar hamda 1 million so‘m naqd pullarni talon-toroj qilgan.

Sudyaning bildirishicha, jiyanining kelib ketganidan xabari bo‘lmagan R.S. oilasi bilan marakadan qaytgach, xonadonida o‘g‘rilik sodir bo‘lganini ko‘rgan. Hamda tuman IIBga xabar bergan. Ichki ishlari organlari xodimlari tomonidan o‘g‘ri qidirilayotgan va uning shaxsi aniqlanayotgan paytda Sh.Sh. bir dona tilla zanjir va bir dona qizil ko‘zli ayollar tilla uzugini Zarafshon shahridagi zargarlik ustaxonalaridan biriga 500 dollarga pullagan. Oradan besh-olti kun o‘tgach, Sh.Sh.ning yashash xonadoniga G‘ijduvon tuman IIB xodimlari kelgan va u bilan surishtiruv ishlari olib borgan.

“O‘zim Navoiy kon-metallurgiya kombinati ishchisiman. Oylik maoshim yetarli. Oilada ham kam-ko‘stsiz yashayman. Amakimning Rossiyadan boyib kelganini eshitganim va uyda hech kim yo‘qligini bilganim uchunmi, bilmadim, aqlim shoshib, o‘zim bilib-bilmagan holda o‘g‘rilikka qo‘l urdim. Aslida, umuman, bunday niyatim yo‘q edi. Uyatda qoldim. Ota-onamning ham boshini egdim. Qarindoshlar oldida izzaman. Qilmishimdan pushaymonman”, — degan Sh.Sh.sud-tergov jarayonlarida.

Sud aybdorning qilmishiga to‘liq iqrorligini, amakisiga yetkazilgan zararni to‘liq qoplaganini inobatga olib, sud hay’atidan qonuniy yengillik berishni so‘ragan. Jabrlanuvchi ham jiyaniga da’vosi yo‘qligini bildirgan. Shularni inobatga olib, Sh.Sh.ga nisbatan Jinoyat kodeksi 169-moddasi 2-qismining “b”, “g” bandlari (o‘g‘rilik) qo‘llanilib, unga 3 yil muddatga axloq tuzatish ishlari jazosi tayinlangan. Aybdor shu muddat ichida oylik ish haqining 20 foizini davlat daromadiga to‘lab boradigan bo‘lgan.