Sudlar tizimida fuqarolar o‘z nizosini hal qilish uchun qaysi sudga murojaat qilishini aniqlashda yordam beradigan yagona darcha tamoyilini keng joriy etish belgilanmoqda. Bu haqda 14-aprel kuni AOKAda bo‘lib o‘tgan matbuot anjumanida Oliy sud raisining birinchi o‘rinbosari Robaxon Mahmudova ma’lum qildi, deya xabar bermoqda “Daryo” muxbiri.
Robaxon Mahmudovaning aytishicha, Oliy sud tomonidan ishlab chiqilgan yangi qonun loyihasida sudlar tizimida yagona darcha tamoyilini joriy etish nazarda tutilgan.
“O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi ishlab chiqildi. Xabaringiz bor, ayrim hollarda ishlarni sudlarda taalluqligi bo‘yicha amaliyotda muammolar kelib chiqib, fuqarolar o‘z nizosini hal qilish uchun qaysi sudga – fuqarolik ishlari bo‘yicha sudgami, iqtisodiy yoki ma’muriy sudga murojaat qilishida tushunmovchiliklar kelib chiqmoqda. Bu esa fuqarolarning ovoragarchiliklariga sabab bo‘layotgan edi. Shu munosabat bilan yangi qonun loyihasiga asosan, sudlar tizimida yagona darcha tamoyilini keng joriy etish, jumladan sudlar tomonidan da’vo arizasi, ariza hamda shikoyatni sudga taalluqli bo‘lmaganligi sababli qabul qilishni rad etish yoki ish bo‘yicha ish yuritishni tugatish amaliyotini taqiqlash kabi protsessual normalar belgilanmoqda.
Bunda, da’vo arizasi, ariza yoki shikoyat, ularni ko‘rib chiqishga vakolatli sudga o‘tkaziladi. Natijada fuqarolarning ovoragarchiliklari oldi olinib, ularning nizolari taalluqli sud tomonidan o‘z vaqtida ko‘rib chiqiladi. Ya’ni bunda fuqarolar emas, hujjatlar suddan sudga harakatlanadi”, — dedi rais o‘rinbosari.
Robaxon Mahmudovaning qo‘shimcha qilishicha, yangi qonun loyihasiga ma’muriy sudlarning hal qiluv qarorlari ijro qilinmagan taqdirda, davlat organlarining mansabdor shaxslariga nisbatan “oshib boruvchi” sud jarimalarini qo‘llash tartibi kiritilmoqda.
“Bunda, davlat organlari yoki tashkilotlari ma’muriy sudning hal qiluv qarorini u qonuniy kuchga kirgan kundan boshlab belgilangan muddatda ijro qilish hamda bu haqda ma’muriy sudga xabar berishi kerak bo‘ladi. Qonuniy sud qarori chiqarilgani bilan, agar u ijro etilmasa, nizo ohirigacha hal etilmagan hisoblanadi. Shu sababli, jarimalarni qo‘llanilishi, sud qarorlarining ijro etilishida ta’sirchan mexanizm sifatida, fuqarolarning huquq va manfaatlarini to‘liq ta’minlashga zamin yaratadi”, — dedi Oliy sud rahbari o‘rinbosari.
Avvalroq O‘zbekistonda sud hujjatlarini ijro etishga aralashganlik uchun javobgarlik belgilangani xabar qilingandi.
Izoh (0)