Rossiyaning Samara viloyati gubernatori o‘rinbosari Natalya Katina boshchiligidagi delegatsiya Namanganga keldi. Bu haqda “Daryo” muxbiri Azizbek Abduvaliyev xabar bermoqda.
Delegatsiya tarkibidan Samara hukumati mas’ullari, viloyatdagi ta’lim va tibbiyot tizimlari mutasaddilari, korxona va kompaniyalar vakillari o‘rin olgan.
Mehmonlarni Namangan viloyati hokimi Shavkat Abdurazzaqov qabul qildi. U viloyatning eksport hajmida Samara salmoqli o‘rin egallashi, 2021-yili ushbu mintaqaga 9 million dollarlik mahsulotlar, jumladan, avtomobil yoritgichlari, momiq sochiqlar, kalava-ip va noto‘qima matolar yuborilganini ta’kidladi. Samara delegatsiyasini joriy yil 22—31-may kunlari Namanganda bo‘lib o‘tadigan an’anaviy xalqaro gullar festivaliga taklif etdi.
Natalya Katina O‘zbekiston, xususan, Namangan viloyatning strategik sheriklaridan biri ekanini bildirdi. Unga ko‘ra, Samara Rossiyaning 14 ta mintaqadan iborat Privoljsk federal okrugida O‘zbekiston bilan tovar aylanmasi bo‘yicha birinchi o‘rinda turadi. Pandemiyaga qaramay, oxirgi ikki yil davomida viloyatning O‘zbekiston bilan tovar aylanmasi 30 foizdan ko‘proqqa oshgan.
“Bu gal 19 ta korxona va kompaniya, tashkilot va muassasa vakillari hamrohligida keldik. Missiyamizdan maqsad o‘zaro aloqalarni yanada mustahkamlashdan iborat. Samarada Namanganning tekstil mahsulotlari, qurilish materiallari, meva-sabzavotlariga qiziqish va ehtiyoj katta. Qolaversa, turizm borasidagi salohiyat va imkoniyatlarimizdan hali to‘liq foydalanganimiz yo‘q. Birgina Samara—Namangan to‘g‘ridan to‘g‘ri aviareysi yo‘lga qo‘yilgani ham shundan dalolat beradi”, — dedi Natalya Katina “Daryo” muxbiriga bergan intervyusida.
Samara viloyati gubernatori o‘rinbosari Namangan hokimining viloyatda bo‘lib o‘tadigan xalqaro gullar festivalida ishtirok etish haqidagi taklifini mamnuniyat bilan qabul qildi. O‘z o‘rnida, namanganlik testil ustalarini “Samara modasi” ko‘rgazmasida, fermerlarni esa meva-sabzavot va poliz mahsulotlari yarmarkasida faol ishtirok etishga chaqirdi.
Rasmiy qabuldan so‘ng mehmonlar va mezbonlarning yuzma-yuz amaliy uchrashuvlari boshlandi.
Delegatsiyalar yo‘nalishlari bo‘yicha uchta — ta’lim, tibbiyot va tadbirkorlar guruhlariga bo‘linib, o‘zaro taqdimot va muzokaralarga kirishdi.
Izoh (0)