Бухоро вилоятининг Ғиждувон туманида амакиси уйига ўғриликка тушган жиянга суд ҳукми ўқилди. Бу ҳақда «Дарё»га Жиноят ишлари бўйича Ғиждувон тумани суди судьяси Бобораҳим Очилов хабар берди.
Навоий вилоятининг Зарафшон шаҳрида туғилган 24 ёшли Ш.Ш. яшаш тарзи яхши ва ҳар томонлама тўкис оилада яшаб келаётган бўлса-да, Ғиждувон туманида яшовчи амакиси ҳовлисига ўғриликка тушиб, унга йирик миқдорда зарар келтирган.Ш.Ш. Россия Федерациясида ишлаб қайтган амакиси Р.С.ни кўриш учун унинг Ғиждувон туманидаги хонадонига меҳмон бўлиб борган. Бироқ дарвозаси берклиги сабаб ҳовли олдида анча вақт кутган. Ҳеч ким келавермагач, иккинчи амакиси В.С.га қўнғироқ қилиб, уларнинг қаерда эканини сўраган ва узоқ қишлоққа маракага кетганини билиб олган.
Суд ҳужжатларида қайд этилишича, амакисининг ҳовлисида ҳеч ким йўқлигини билган Ш.Ш. орқа девор орқали яширин равишда ҳовлига кирган. Эшик ва деразалари қулфланган хоналарнинг дераза ойналарини синдириб, дераза ошхона ичкарисига ўтган. Хона бурчагидаги сандиқ устидаги кўрпа-тўшакларни ағдариб, капкир билан сандиқнинг тепа қисмидаги ёғоч қисмларини синдириб очган ва унинг ичидан 6 минг доллар ҳамда 250 минг сўм нақд пулларни, аёллар сумкаси ичида бўлган жами баҳоси 8 миллион 400 минг сўмлик тилла ва кумуш тақинчоқлар ҳамда 1 миллион сўм нақд пулларни талон-торож қилган.
Судьянинг билдиришича, жиянининг келиб кетганидан хабари бўлмаган Р.С. оиласи билан маракадан қайтгач, хонадонида ўғрилик содир бўлганини кўрган. Ҳамда туман ИИБга хабар берган. Ички ишлари органлари ходимлари томонидан ўғри қидирилаётган ва унинг шахси аниқланаётган пайтда Ш.Ш. бир дона тилла занжир ва бир дона қизил кўзли аёллар тилла узугини Зарафшон шаҳридаги заргарлик устахоналаридан бирига 500 долларга пуллаган. Орадан беш-олти кун ўтгач, Ш.Ш.нинг яшаш хонадонига Ғиждувон туман ИИБ ходимлари келган ва у билан суриштирув ишлари олиб борган.
«Ўзим Навоий кон-металлургия комбинати ишчисиман. Ойлик маошим етарли. Оилада ҳам кам-кўстсиз яшайман. Амакимнинг Россиядан бойиб келганини эшитганим ва уйда ҳеч ким йўқлигини билганим учунми, билмадим, ақлим шошиб, ўзим билиб-билмаган ҳолда ўғриликка қўл урдим. Аслида, умуман, бундай ниятим йўқ эди. Уятда қолдим. Ота-онамнинг ҳам бошини эгдим. Қариндошлар олдида иззаман. Қилмишимдан пушаймонман», — деган Ш.Ш.суд-тергов жараёнларида.
Суд айбдорнинг қилмишига тўлиқ иқрорлигини, амакисига етказилган зарарни тўлиқ қоплаганини инобатга олиб, суд ҳайъатидан қонуний енгиллик беришни сўраган. Жабрланувчи ҳам жиянига даъвоси йўқлигини билдирган. Шуларни инобатга олиб, Ш.Ш.га нисбатан Жиноят кодекси 169-моддаси 2-қисмининг «б», «г» бандлари (ўғрилик) қўлланилиб, унга 3 йил муддатга ахлоқ тузатиш ишлари жазоси тайинланган. Айбдор шу муддат ичида ойлик иш ҳақининг 20 фоизини давлат даромадига тўлаб борадиган бўлган.
Изоҳ (0)