Tashqi ishlar vazirligida Finlyandiyaning O‘zbekistondagi yangi tayinlangan elchisi (qarorgohi Xelsinkida) Ilkka Raisanen bilan videokonferensiya shaklida uchrashuv bo‘lib o‘tdi, deb xabar bermoqda “Dunyo” agentligi.
Muzokaralar chog‘ida elchining ishonch yorliqlarini taqdim etish uchun Toshkentga tashrifini tashkil etish, O‘zbekiston vazirlik va idoralarida ikki tomonlama uchrashuvlar o‘tkazishning amaliy jihatlari, shuningdek, O‘zbekiston—Finlyandiya hamkorligini yanada kengaytirish bo‘yicha aniq vazifalar muhokama qilingan.
2022-yilda Toshkentda siyosiy maslahatlashuvlarning muntazam raundlarini va savdo-iqtisodiy, ilmiy-texnikaviy hamkorlik bo‘yicha Hukumatlararo komissiya yig‘ilishini o‘tkazish, shuningdek, Markaziy Osiyo mamlakatlari bilan hamkorlik bo‘yicha Finlyandiya parlamentlararo guruhi rahbari Kimmo Kilyunen boshchiligidagi delegatsiyasining 2022-yil avgust oyida O‘zbekistonga tashrifini birgalikda tayyorlashga kelishib olingan.
61 yoshli Ilkka Raisanen tayinlovga qadar Finlyandiya Tashqi ishlar vazirligi departamenti direktori maslahatchisi lavozimida ishlagan.
Avvalroq Qirg‘iziston, Koreya va Dominikana Respublikalarining O‘zbekistondagi yangi elchilari tayinlangani to‘g‘risida xabar berilgandi.
Izoh (0)