Samarqand tumanida 24-mart kuni uch nafar fuqaro qabrtosh o‘g‘irlagani aniqlandi. Bu haqda Tergov departamenti xabar qildi.
Qayd etilishicha, 6-aprel kuni M.R. (29 yoshli) Samarqand tumani IIBga ariza bilan murojaat qilgan. Unda 23-martdan 24-martga o‘tar kechasi Samarqand tumani Yagona ko‘chasida joylashgan “Talibarzu” qabristoni hududida joylashgan o‘ziga tegishli “Gravit Travertine Mramor” MCHJga qarashli qabr toshlarini ishlab chiqarish sexidan narxi 1 ming dollar bo‘lgan bir dona 70x170 sm o‘lchamdagi qora rangli “granit gabro” nomli tosh noma’lum shaxslar tomonidan o‘g‘irlab ketilganini ma’lum qilgan. Fuqaro noma’lum shaxslarni aniqlashda amaliy yordam berishni so‘ragan.
Olib borilgan tezkor qidiruv tadbirlar natijasida mazkur o‘g‘rilikni Samarqand tumanida yashovchi N.S. (27 yoshli), I.Sh. (20 yoshli) va A.Z. (18 yoshli) sodir etgani aniqlangan. Ulardan “granit gabro” nomli tosh ashyoviy dalil tariqasida tegishli tartibda rasmiylashtirib olingan.
Holat yuzasidan yuqoridagi shaxslarga nisbatan Jinoyat kodeksning 169-moddasi 2-qismi “v” bandi (bir guruh shaxslar tomonidan oldindan til biriktirib sodir etilgan o‘g‘rilik) bilan jinoyat ishi qo‘zg‘atilgan. Hozirda tergov harakatlari davom etmoqda.
Izoh (0)