Ташқи ишлар вазирлигида Финляндиянинг Ўзбекистондаги янги тайинланган элчиси (қароргоҳи Хелсинкида) Илкка Раисанен билан видеоконференция шаклида учрашув бўлиб ўтди, деб хабар бермоқда «Дунё» агентлиги.
Музокаралар чоғида элчининг ишонч ёрлиқларини тақдим этиш учун Тошкентга ташрифини ташкил этиш, Ўзбекистон вазирлик ва идораларида икки томонлама учрашувлар ўтказишнинг амалий жиҳатлари, шунингдек, Ўзбекистон—Финляндия ҳамкорлигини янада кенгайтириш бўйича аниқ вазифалар муҳокама қилинган.
2022 йилда Тошкентда сиёсий маслаҳатлашувларнинг мунтазам раундларини ва савдо-иқтисодий, илмий-техникавий ҳамкорлик бўйича Ҳукуматлараро комиссия йиғилишини ўтказиш, шунингдек, Марказий Осиё мамлакатлари билан ҳамкорлик бўйича Финляндия парламентлараро гуруҳи раҳбари Киммо Килюнен бошчилигидаги делегациясининг 2022 йил август ойида Ўзбекистонга ташрифини биргаликда тайёрлашга келишиб олинган.
61 ёшли Илкка Раисанен тайинловга қадар Финляндия Ташқи ишлар вазирлиги департаменти директори маслаҳатчиси лавозимида ишлаган.
Аввалроқ Қирғизистон, Корея ва Доминикана Республикаларининг Ўзбекистондаги янги элчилари тайинлангани тўғрисида хабар берилганди.
Изоҳ (0)