O‘zbekistonda elektr energiyasidan qarzdorligi eng yuqori hudud Samarqand viloyati hisoblanadi. Bu haqda 12-aprel kuni AOKAda o‘tkazilgan matbuot anjumanida “Hududiy elektr tarmoqlari” AJ boshqaruv raisining o‘rinbosari Dilshod Nosirov ma’lum qildi, deya xabar bermoqda “Daryo” muxbiri.
Dilshod Nosirovning ta’kidlashicha, bugungi kunda Samarqand viloyatining elektr energiyasidan qarzdorligi qariyb 900 milliard so‘mga yaqin.
“ASKUE tizimi joriy etilgandan keyin aholining elektr energiyasidan qarzdorligi keskin kamaydi. Hamma viloyatni aytmasam-da, ayrimlarining qarzdorligi bo‘yicha to‘xtalib o‘taman. Masalan, Qoraqalpog‘iston Respublikasi aholisining elektr energiyasidan qarzdorligi 19 milliard so‘mni tashkil etmoqda. Xorazm viloyatida 36 milliard so‘m qarzdorlik mavjud. Eng ko‘p qarzdorlik Samarqand viloyatida bo‘lib, hozirda hududning elektr energiyasidan 900 milliard so‘mga yaqin qarzi bor”, — dedi tashkilot mas’uli.
Anjumanda aytilishicha, avvallari iste’molchilarning 60-70 foizi elektr energiyasidan qarzdor bo‘lgan. Bugungi kunda bu ko‘rsatgich 5-7 foizni tashkil etmoqda.
Avvalroq elektr energiyasidan qarzdorligi ko‘p viloyatlar uchligi ma’lum qilingandi. Jumladan, Samarqand viloyati birinchi (646 milliard so‘m), Navoiy viloyati ikkinchi (410 milliard so‘m) va Andijon viloyati (273 milliard so‘m) uchinchi o‘rinda ekani ochiqlangan.
Izoh (0)