Ўзбекистонда электр энергиясидан қарздорлиги энг юқори ҳудуд Самарқанд вилояти ҳисобланади. Бу ҳақда 12 апрель куни АОКАда ўтказилган матбуот анжуманида «Ҳудудий электр тармоқлари» АЖ бошқарув раисининг ўринбосари Дилшод Носиров маълум қилди, дея хабар бермоқда «Дарё» мухбири.
Дилшод Носировнинг таъкидлашича, бугунги кунда Самарқанд вилоятининг электр энергиясидан қарздорлиги қарийб 900 миллиард сўмга яқин.
«ASKUE тизими жорий этилгандан кейин аҳолининг электр энергиясидан қарздорлиги кескин камайди. Ҳамма вилоятни айтмасам-да, айримларининг қарздорлиги бўйича тўхталиб ўтаман. Масалан, Қорақалпоғистон Республикаси аҳолисининг электр энергиясидан қарздорлиги 19 миллиард сўмни ташкил этмоқда. Хоразм вилоятида 36 миллиард сўм қарздорлик мавжуд. Энг кўп қарздорлик Самарқанд вилоятида бўлиб, ҳозирда ҳудуднинг электр энергиясидан 900 миллиард сўмга яқин қарзи бор», — деди ташкилот масъули.
Анжуманда айтилишича, авваллари истеъмолчиларнинг 60-70 фоизи электр энергиясидан қарздор бўлган. Бугунги кунда бу кўрсатгич 5-7 фоизни ташкил этмоқда.
Аввалроқ электр энергиясидан қарздорлиги кўп вилоятлар учлиги маълум қилинганди. Жумладан, Самарқанд вилояти биринчи (646 миллиард сўм), Навоий вилояти иккинчи (410 миллиард сўм) ва Андижон вилояти (273 миллиард сўм) учинчи ўринда экани очиқланган.
Изоҳ (0)