O‘zbekistonda 2022-yil 25-yanvar kuni sodir bo‘lgan elektr ta’minotidagi yirik miqyosli uzilish bo‘yicha hukumat komissiyasi xulosa beradi. Bu haqda 12-aprel kuni AOKAda o‘tkazilgan matbuot anjumanida “Hududiy elektr tarmoqlari” AJ bosh boshqarmasi boshlig‘i o‘rinbosari Ulug‘bek Hakimov ma’lum qildi, deya xabar bermoqda “Daryo” muxbiri.
Ulug‘bek Hakimovning aytishicha, elektr energiyasi ta’minotidagi uzilishga tizimdagi tarmoqlar eskirgani ta’sir ko‘rsatgan.
“25-yanvardagi blekaut barcha energetiklar uchun sinovli bo‘ldi. Bunda asosiy ishlab chiqaruvchi va elektr energiyasi tarqatuvchi tarmoqlarimizning aksariyat qismi 60—80-yillarda ishga tushirilgani o‘z ta’sirini ko‘rsatdi. Qo‘shni davlatlar bilan 220 va 500 volt kuchlanishli tarmoqlar orqali bog‘liqmiz va parallel ravishda, yagona energetika tizimida ishlaymiz. Qaysi hududda bunday holat yuzaga kelgani haqida axborot bermoqchi emasman. Chunki bu haqda hukumat komissiyasi yig‘ilish o‘tkazib, xulosalarini beradi. Bu voqea yuz bergach, albatta, o‘zimizning tizim uchun katta xulosalarga keldik”, — dedi tashkilot vakili.
Anjumanda Ulug‘bek Hakimov blekautdan keyin tizimda nimalarga e’tibor qaratilishi zarurligiga ham to‘xtaldi.
“Blekautda mutaxassislarimiz malakasini oshirish, joylarda tezkor texnik tadbirlarni o‘tkazish, ishlab chiqarish quvvatlarini birinchi navbatda toifalashgan, ya’ni shifoxonalar va boshqa obyektlarni elektr energiyasi bilan ta’minlashga yo‘naltirish muhimligi namoyon bo‘ldi. Shuningdek, muqobil (quyosh, shamol) elektr manbalarini ishlab chiqarishni jadallashtirish zarurligi ham yaqqol ko‘rinib qoldi. Zaxira ta’minot manbalarini yaratish ham muhim ahamiyatga ega. Chunki bunday uzilishlar bir onda sodir bo‘ladi. Ayniqsa, toifalashgan obyektlarda qayta tiklanuvchi energiyada ishlaydigan uskunalarni kengroq joriy etishimiz kerak”, — dedi mutaxassis.
Avvalroq Energetika vaziri o‘rinbosari Sherzod Xo‘jayev O‘zbekiston bo‘ylab ro‘y bergan elektr ta’minotidagi uzilish sabablari hozir ham o‘rganilayotganini aytgandi.
Izoh (0)