Sirdaryo viloyati Guliston shahridagi maktabda o‘quvchining yaqinlari o‘qituvchi va maktab direktori o‘rinbosarini kaltaklagani aytildi. Bu haqda “Daryo” manbasi xabar berdi.
Viloyatning Guliston shahridagi 5-sonli umumta’lim maktabida bo‘lib o‘tgani aytilgan janjalga o‘quvchining maktabga kechikib kelgani va o‘qituvchining unga tanbeh bergani sabab qilib ko‘rsatilmoqda.“O‘qituvchi darsga kechikib kelgan o‘quvchidan nimaga tartibga rioya qilmayotgani to‘g‘risida so‘ragan, evaziga esa undan haqoratli so‘zlar eshitgan. O‘qituvchi shunda ham bosiqlik qilib, bu haqda direktor o‘rinbosariga xabar bergan. Direktor o‘rinbosari o‘quvchiga bunday holat yaxshi emasligini tushuntirmoqchi bo‘lganida o‘quvchi uni ham haqoratlab uyiga ketib qolgan. Birozdan so‘ng mushtumzo‘rlarni olib kelib, maktab binosida dastlab o‘qituvchini, so‘ngra uni himoya qilmoqchi bo‘lgan direktor o‘rinbosarini ayovsiz kaltaklashgan. Hozirda o‘qituvchi va direktor o‘rinbosariga Respublika shoshilinch tibbiy yordam ilmiy markazi Sirdaryo viloyati filialida tibbiy yordam ko‘rsatilmoqda”, — deydi bu haqda “Daryo” manbasi.
“Daryo” so‘roviga javob bergan Sirdaryo viloyat IIB axborot xizmati rahbari Doston Shamsiddinov voqea 2022-yil 8-aprel kuni sodir bo‘lganini tasdiqlab, holat IIB nazoratiga olinganini, surishtiruv ishlari davom etayotganini ma’lum qildi.
Sirdaryo viloyati xalq ta’limi boshqarmasi axborot xizmati voqeaga o‘quvchining kechikib kelishi sabab bo‘lganini tasdiqlab, oqibatda o‘quvchi U.A. hamda o‘qituvchi N.G‘ o‘rtasida o‘zaro kelishmovchilik yuzaga kelganini ma’lum qildi.
“Holatdan xabar topgan o‘quvchi U.A.ning oila a’zolari maktab binosiga kelib, maktab ma’muriyati bilan janjallashgan. Natijada esa direktorning o‘quv ishlari bo‘yicha o‘rinbosari M.Yu. hushini yo‘qotgan va Guliston shahar shoshilinch tez-tibbiy yordam markaziga joylashtirilgan”, — deydi viloyat xalq ta’limi boshqarmasi axborot xizmati rahbari.
Qo‘shimcha qilinishicha, mazkur voqeadan so‘ng Guliston shahri hokimi To‘lqinjon Dadaboyev 5-umumta’lim maktabida bo‘lib, maktablarda ijtimoiy-ma’naviy muhitni sog‘lomlashtirish hamda voyaga yetmagan o‘quvchilar o‘rtasida jinoyatchilik va huquqbuzarlikni oldini olish bo‘yicha yig‘ilish o‘tkazilgan. Tadbirda sektor rahbarlari, hokim o‘rinbosarlari, shahar umumta’lim maktabi direktorlari va ularning ma’naviy ma’rifiy ishlar bo‘yicha o‘rinbosarlari ishtirok etgan.
Yig‘ilishda Guliston shahar xalq ta’limi bo‘limi mudiri Samandar Ortiqovga har bir umumta’lim maktablari pedagog jamoasi bilan uchrashuvlar tashkil etish bo‘yicha reja-jadval ishlab chiqish vazifasi topshirilgan.
Izoh (0)