Elektr energiyasi qaysi viloyatlarda eng ko‘p iste’mol qilinayotgani ma’lum bo‘ldi

Elektr energiyasi iste’molining yuqori hajmi aholi zich va ishlab chiqarish miqdori yirik bo‘lgan viloyatlar hissasiga to‘g‘ri keladi. Bu haqda “Hududiy elektr tarmoqlari” AJ bosh boshqarmasi boshlig‘i o‘rinbosari Ulug‘bek Hakimov “Daryo” muxbiriga bergan intervyusida ma’lum qildi.

Ulug‘bek Hakimovning ta’kidlashicha, 5 ta viloyatda aholi zichligi uchun, 2 ta viloyatda yirik ishlab chiqarish korxonalari mavjudligi sababli elektr energiyasi boshqa viloyatlarga qaraganda ko‘proq iste’mol qilinadi.

Hozirda aholi zich joylashgan hududlar — Samarqand, Qashqadaryo, Farg‘ona, Andijon va Namangan viloyatlarida elektr energiyasi iste’moli eng yuqori hisoblanadi. Shu bilan birga, yirik ishlab chiqarish korxonalari mavjud bo‘lgan sanoat hududlari — Navoiy va Toshkent viloyatlarida ham elektr energiyasi iste’moli boshqa viloyatlarga nisbatan yuqori. Masalan, “Navoiy tog‘-kon metallurgiya kombinati”, “Olmaliq tog‘-kon metallurgiya kombinati”, “Navoiyazot” kabi ulkan korxonalar ishlashi uchun juda ko‘p miqdorda elektr sarflanadi, — dedi tashkilot mas’uli.

“Korxonamiz respublikaning barcha hududlarida 7 milliondan ortiq iste’molchiga elektr energiyasini yetkazib beradi. Mamlakat hududlarida 90 mingdan ortiq transformator mavjud. 267 ming kilometr elektr tarmoqlari bizning tasarrufimizda. 25 ming 700 nafarga yaqin xodim aholiga xizmat ko‘rsatadi”, — dedi Ulug‘bek Hakimov.

Avvalroq elektr energiyasidan qarzdorligi eng yuqori hudud Samarqand viloyati ekani xabar qilingandi.