Buxoro viloyat IIB axborot xizmati “Maxsustrans” mashinasi ona-bola o‘limiga sabab bo‘lgani haqida xabar bergandi. Keyinchalik xabarga aniqlik kiritgan IIB ularning ona-bola emasligini qo‘shimcha qildi. “Daryo” muxbirining aniqlashicha, voqea joyida yana bir bola bo‘lgan.
Boshi: Buxorodagi chiqindixona yonida “Maxsustrans” mashinasi ayol va aravachadagi bolani bosib ketdi
Alisher Nazarovning so‘ziga ko‘ra, haydovchi avtomashinani Buxoro shahar “Istiqlol” mahallasi bo‘ylab boshqarib borib, ushbu ko‘chadagi 84/1-sonli ko‘p qavatli uyning orqa tomonida joylashgan chiqindixonadan chiqib ketayotgan bo‘lgan.
Aholining aytishicha, avtomashina burilayotganda axlatxona konteyneri ortidan kutilmaganda qiz va bola chiqib qolgan. Hamda baxtsiz hodisa sodir bo‘lgan.
Buxoro viloyat IIBning Telegram-kanalida baxtsiz tasodif tufayli vafot etganlar dastlab ona va bola ekani ma’lum qilindi. “Daryo” muxbirining aniqlik kiritishicha, bolaning onasi deyilayotgan marhuma xolasining uyiga mehmonga kelgan 25 yoshli, hali turmushga chiqmagan N.Y. bo‘lgan. U bir yarim yoshli jiyani A. hamda besh yoshli jiyani M.larni yetaklab, axlat to‘kkani chiqqan bo‘lgan. Qizaloq bolalar aravasida bo‘lgani sababli N.Y. u bilan axlatxona konteyneri yaqinigacha borgan va har ikkisi ham avtomashina g‘ildiragi ostida qolib ketgan. Tasodif tufayli besh yoshli M. ortga qaytgan va voqea joyidan qochib qolgan.
“Avtotransport vositasini boshqarishda ko‘rinmas hudud degan termin bor. Har qanday vaziyatda ham avtotransport boshqaruvchisi xavfsizlik qoidalariga to‘la rioya qilgan holda harakatlanishi shart. Haydovchi necha yillik tajribaga ega bo‘lsa ham, u ko‘p sonli aholi yashash manzillarida xizmat ko‘rsatadi. Chiqindixonalarga har daqiqada aholi kirib-chiqishi ehtimoli borligini bilgan va anglagan holda transport vositasini boshqarishi va boshqaruv qoidalariga qat’iy rioya qilishi shart edi. Mana shu ehtiyotsizligi oqibatida ikki ota-onaning bir umr dog‘da qolishiga sabab bo‘ldi”, — deydi viloyat IIB axborot xizmati rahbari Shuhrat Jalolov.
Izoh (0)