Электр энергияси истеъмолининг юқори ҳажми аҳоли зич ва ишлаб чиқариш миқдори йирик бўлган вилоятлар ҳиссасига тўғри келади. Бу ҳақда «Ҳудудий электр тармоқлари» АЖ бош бошқармаси бошлиғи ўринбосари Улуғбек Ҳакимов «Дарё» мухбирига берган интервьюсида маълум қилди.
Улуғбек Ҳакимовнинг таъкидлашича, 5 та вилоятда аҳоли зичлиги учун, 2 та вилоятда йирик ишлаб чиқариш корхоналари мавжудлиги сабабли электр энергияси бошқа вилоятларга қараганда кўпроқ истеъмол қилинади.
Ҳозирда аҳоли зич жойлашган ҳудудлар — Самарқанд, Қашқадарё, Фарғона, Андижон ва Наманган вилоятларида электр энергияси истеъмоли энг юқори ҳисобланади. Шу билан бирга, йирик ишлаб чиқариш корхоналари мавжуд бўлган саноат ҳудудлари — Навоий ва Тошкент вилоятларида ҳам электр энергияси истеъмоли бошқа вилоятларга нисбатан юқори. Масалан, «Навоий тоғ-кон металлургия комбинати», «Олмалиқ тоғ-кон металлургия комбинати», «Навоийазот» каби улкан корхоналар ишлаши учун жуда кўп миқдорда электр сарфланади, — деди ташкилот масъули.Улуғбек Ҳакимовнинг айтишича, Ўзбекистонда электр энергиясининг 25 фоиз истеъмоли аҳоли, 75 фоиз истеъмоли саноат ва ижтимоий соҳа объектлари ҳиссасига тўғри келади.
«Корхонамиз республиканинг барча ҳудудларида 7 миллиондан ортиқ истеъмолчига электр энергиясини етказиб беради. Мамлакат ҳудудларида 90 мингдан ортиқ трансформатор мавжуд. 267 минг километр электр тармоқлари бизнинг тасарруфимизда. 25 минг 700 нафарга яқин ходим аҳолига хизмат кўрсатади», — деди Улуғбек Ҳакимов.
Аввалроқ электр энергиясидан қарздорлиги энг юқори ҳудуд Самарқанд вилояти экани хабар қилинганди.
Изоҳ (0)