Toshkentda tramvayni tiklash bo‘yicha texnik iqtisodiy asoslarni o‘rganish komissiyasi tuzilgan

Poytaxtga tramvayni tiklash bo‘yicha texnik iqtisodiy asoslarni o‘rganish bo‘yicha komissiyasiga xorijlik ekspertlarni ham jalb etish ko‘zda tutilgan. Bu haqda 12-aprel kuni Milliy matbuot markazida bo‘lib o‘tgan matbuot anjumanida Avtomobil va daryo transportini rivojlantirish departamenti boshlig‘i Ruslan Ruzmetov ma’lum qildi.

Uning aytishicha, Toshkent shahrida tramvayni tiklash bo‘yicha topshiriq bor.

Hozir bu bo‘yicha texnik iqtisodiy asoslarni o‘rganish bo‘yicha komissiya tuzilgan. Hozirda bu masala ko‘rib chiqilmoqda va masalani ko‘rib chiqishda xorijlik ekspertlarni jalb etish ham ko‘zda tutilgan. Endilikda texnik iqtisodiy asoslarni ilmiy yondashgan holda o‘rganish kerak. Masalan, avval yopilib ketgan tramvay yo‘nalishlarining yopilish sabablari to‘laqonli o‘rganiladi.

Shuningdek, birinchi navbatda, tramvayni qayta joriy qilish masalasi; ikkinchi navbatda, qayerda va qaysi yo‘nalishda amalga oshirishni asoslangan holda qilish uchun texnik iqtisodiy asoslarni ishlab chiqish jarayoni boshlangan. Biz ham qo‘shimcha tarzda bu jarayonlar qanday ketayotgani bo‘yicha ma’lumotlar berib boramiz. Chunki bu juda ham dolzarb masala. Bizga ham ko‘pgina savollar kelib tushgan. Hozirda mavjud infrastruktura hamda yer usti transportini uyg‘unlashgan holda kompleks o‘rganish ishlari olib borilyapti.

Avtomobil va daryo transportini rivojlantirish departamenti boshlig‘i Ruslan Ruzmetov

Shavkat Mirziyoyev 19-yanvar kuni Toshkent shahrida jamoat transportini rivojlantirish chora-tadbirlari bo‘yicha taqdimot bilan tanishgandi. “Menimcha” ko‘rsatuvida transport vazirining taqdimoti prezidentga ma’qul bo‘lmagani haqida so‘z borgan. Aynan ushbu ko‘rsatuvda telejurnalist Xayrulla Nuriddinov Toshkentga tramvay qatnovini qaytarish tarafdori ekanini aytib o‘tgan edi.

“Shahar transporti mavzusi ochilganidan foydalanib, yana bir taklifni aytmoqchiman. Aholiga qulay va sifatli transport xizmatini ko‘rsatish sohasini takomillashtirish maqsadida Toshkentga tramvaylarni qaytarish kerak, menimcha. Katta va gavjum shaharga tramvay juda asqatadi. Hammamizning esimizda-ku o‘sha qulay, bejirim, bir tekisda yuradigan, muhimi, ekologiyaga zarar yetkazmaydigan qadrdon tramvaylarimiz. Bilmadim, balki xato qilayotgandirman, lekin bu mening shaxsiy fikrim. Agar poytaxt mutasaddilarining o‘rnida bo‘lganimda ana shu tashabbus bilan chiqqan bo‘lardim”, — degandi Xayrulla Nuriddinov.

Shavkat Mirziyoyev 10-fevral kuni Samarqand viloyatiga tashrifi davomida fuqarolar murojaati sabab tramvayni Toshkentga qaytarishni aytib o‘tdi. “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — degan edi prezident.

Toshkent shahar hokimi o‘rinbosari Baxtiyor Rahmonov 16-fevral kuni poytaxt hokimligida bo‘lib o‘tgan matbuot anjumanida Navoiy ko‘chasida tramvay bo‘lmasligini aytgan edi. Transport boshqarma boshlig‘i Anvar Jo‘rayev esa tramvay bo‘yicha takliflar borligini bildirgandi.