O‘zbekistonda chet elda ishlab chiqarilgan avtomobillarning sotuv hajmi oylar kesimida ma’lum qilindi. Mart oyida chet elda ishlab chiqarilgan avtomobillarning sotuvi fevralga qaraganda 2,5 foizga kamayib, 1,3 mingtani tashkil qildi. Bu haqda Iqtisodiy tadqiqotlar va islohotlar markazi “Daryo”ga ma’lum qildi
“Inomarka”lar sotuvi noyabrdan beri eng past ko‘rsatkichga tushib ketdi. Oxirgi 14 oy ichida eng yuqori ko‘rsatkich dekabrda qayd etilgan — 2411. Dekabr oyida “inomarka”lar sotuvi noyabrga qaraganda qariyb ikki barobar oshgan.
Yanvar oyida yengil avtomobillar sotuvi 1506 tani tashkil qilib, o‘tgan yilning shu davriga nisbatan qariyb ikki barobar oshdi. Fevralda bu ko‘rsatkich 1801 dona bo‘lgan edi. 2021-yilning fevraliga nisbatan o‘sish 2,7 barobar bo‘ldi.
Mart oyida esa 1275 ta chet elda ishlab chiqarilgan avtomobillar sotildi. Bu o‘tgan yiling shu davriga qaraganda 2 barobarga ko‘proq.
“Inomarka”lar sotuvining oshishi bilan birgalikda, mahalliy ishlab chiqarilgan avtomobillar sotuvi ham so‘nggi uch oyda keskin ko‘paydi. Yanvar va fevral oylarining o‘zida bu ko‘rsatkich 2021-yilning shu davriga nisbatan 2,1 va 2,2 barobarga oshdi.
Mart oyida mahalliy avtomobillar oldi-sotdisi so‘ngi 14 oy ichida eng yuqorisi bo‘ldi.
O‘tgan yanvar—fevral oylaridagi kabi avtomashinalarni ro‘yxatga olishning ko‘payishi avtomobillarni xarid qilish uchun to‘lovlarning bekor qilinishi bilan bog‘liq.
Avvalroq prezident Shavkat Mirziyoyev topshirig‘iga ko‘ra import avtomobillari uchun bojxona boji 2 barobarga qisqartirilgani haqida xabar berilgan edi.
Izoh (0)