Пойтахтга трамвайни тиклаш бўйича техник иқтисодий асосларни ўрганиш бўйича комиссиясига хорижлик экспертларни ҳам жалб этиш кўзда тутилган. Бу ҳақда 12 апрель куни Миллий матбуот марказида бўлиб ўтган матбуот анжуманида Автомобиль ва дарё транспортини ривожлантириш департаменти бошлиғи Руслан Рузметов маълум қилди.
Унинг айтишича, Тошкент шаҳрида трамвайни тиклаш бўйича топшириқ бор.
Ҳозир бу бўйича техник иқтисодий асосларни ўрганиш бўйича комиссия тузилган. Ҳозирда бу масала кўриб чиқилмоқда ва масалани кўриб чиқишда хорижлик экспертларни жалб этиш ҳам кўзда тутилган. Эндиликда техник иқтисодий асосларни илмий ёндашган ҳолда ўрганиш керак. Масалан, аввал ёпилиб кетган трамвай йўналишларининг ёпилиш сабаблари тўлақонли ўрганилади.Эслатиб ўтамиз, 2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва «Ипподром» ўртасида қатновчи 17-йўналиш ёпилганди.Шунингдек, биринчи навбатда, трамвайни қайта жорий қилиш масаласи; иккинчи навбатда, қаерда ва қайси йўналишда амалга оширишни асосланган ҳолда қилиш учун техник иқтисодий асосларни ишлаб чиқиш жараёни бошланган. Биз ҳам қўшимча тарзда бу жараёнлар қандай кетаётгани бўйича маълумотлар бериб борамиз. Чунки бу жуда ҳам долзарб масала. Бизга ҳам кўпгина саволлар келиб тушган. Ҳозирда мавжуд инфраструктура ҳамда ер усти транспортини уйғунлашган ҳолда комплекс ўрганиш ишлари олиб бориляпти.
Автомобиль ва дарё транспортини ривожлантириш департаменти бошлиғи Руслан Рузметов
Шавкат Мирзиёев 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз борган. Айнан ушбу кўрсатувда тележурналист Хайрулла Нуриддинов Тошкентга трамвай қатновини қайтариш тарафдори эканини айтиб ўтган эди.
«Шаҳар транспорти мавзуси очилганидан фойдаланиб, яна бир таклифни айтмоқчиман. Аҳолига қулай ва сифатли транспорт хизматини кўрсатиш соҳасини такомиллаштириш мақсадида Тошкентга трамвайларни қайтариш керак, менимча. Катта ва гавжум шаҳарга трамвай жуда асқатади. Ҳаммамизнинг эсимизда-ку ўша қулай, бежирим, бир текисда юрадиган, муҳими, экологияга зарар етказмайдиган қадрдон трамвайларимиз. Билмадим, балки хато қилаётгандирман, лекин бу менинг шахсий фикрим. Агар пойтахт мутасаддиларининг ўрнида бўлганимда ана шу ташаббус билан чиққан бўлардим», — деганди Хайрулла Нуриддинов.
Шавкат Мирзиёев 10 февраль куни Самарқанд вилоятига ташрифи давомида фуқаролар мурожаати сабаб трамвайни Тошкентга қайтаришни айтиб ўтди. «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деган эди президент.
Тошкент шаҳар ҳокими ўринбосари Бахтиёр Раҳмонов 16 февраль куни пойтахт ҳокимлигида бўлиб ўтган матбуот анжуманида Навоий кўчасида трамвай бўлмаслигини айтган эди. Транспорт бошқарма бошлиғи Анвар Жўраев эса трамвай бўйича таклифлар борлигини билдирганди.
Изоҳ (0)