O‘zbekistonda Sog‘liqni saqlash vazirligi hamda prezidentining rasmiy veb-saytlariga o‘xshash bo‘lgan soxta veb-resurslar orqali fuqarolardan bank plastik karta ma’lumotlarini taqdim etilishiga erishib, undagi mablag‘lar o‘zlashtirib kelinayotgani aniqlandi, deb xabar beradi IIV Kiberxavfsizlik markazi.
Xususan, Telegram tarmog‘idagi bir qator guruh va kanallarda Sog‘liqni saqlash vazirligi nomidan COVID-19 ga qarshi vaksinatsiyadan o‘tgan fuqarolar bir marotabalik 750 ming so‘m pul mablag‘larini berishga oid feyk xabar tarqatilib, ushbu xabar ostiga biriktirilgan havolaga kirilganida 750 ming so‘mni olish ilinjida bo‘lgan foydalanuvchilardan bank plastik karta rekvizitlari hamda SMS xabarnomada ko‘rsatilgan maxfiy kod-raqam so‘ralayotgani ma’lum bo‘lgan.
Shuningdek, ijtimoiy tarmoqlarda O‘zbekiston prezidenti nomidan ijtimoiy va demografik holatni yaxshilash uchun farzandi bor oilalarga bir marotabalik 650 ming so‘m pul mablag‘larini moddiy yordam sifatida berishga oid qonun kuchga kirgani to‘g‘risidagi feyk xabar tarqatilgan. Xabar ostidagi havolaga kirilganda 650 ming so‘m olishga erishish uchun foydalanuvchidan o‘z bank plastik karta raqamlarini hamda SMS xabarnomada ko‘rsatilgan maxfiy kod so‘raladi va “ehtiyojmand mijoz” ushbu ma’lumotlarni kiritgach, plastik kartasidagi mavjud pul mablag‘laridan mahrum bo‘lishi aniqlangan.
Tezkor tadbirlar natijasida bu kabi feyk xabar ta’siriga tushgan 1 nafar fuqaroning 7,5 million so‘m pul mablag‘lari Toshkent shahrida yashovchi 22 yoshli I.R. tomonidan firibgarlik yo‘li bilan o‘zlashtirilgani aniqlanib, holat yuzasidan Yunusobod tumani IIO FMB tomonidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan.
Avvalroq firibgarlar O‘zbekiston prezidenti sayti soxta havolasini yaratib, plastik kartalardan pul o‘g‘irlamoqchi bo‘lgani aniqlangandi.
Izoh (0)